قاڭتار تراگەدياسى: الماتىدا عيماراتتاردى ورتەۋ كەزىندە تۇسىرىلگەن جاڭا ۆيدەو پايدا بولدى
سونىڭ بىرىندە الماتىداعى مەملەكەتتىك مەكەمەلەر وتقا ورانعان كەزدە ماڭايىندا جۇرگەن ادامدار ءتۇسىپ قالعان، دەپ حابارلايدى قازاقپارات ءتىلشىسى.
ءتۇرلى كادرلەردەن جيناقتالعان ۆيدەونىڭ باسىندا ورتەنىپ جاتقان عيماراتتىڭ ماڭىندا قاپتاپ جۇرگەن ادامدار توبىن كورۋگە بولادى. ءبىرى جايباراقات سۋرەتكە ءتۇسىپ جاتسا، تاعى ءبىرى تانىسىنىڭ اتىن اتاپ، يەسىز قالعان كاسكانى ۇسىنادى.
ەرسىلى- قارسىلى ادامداردىڭ ءبىر شەتىندە نامازعا جىعىلۋ يشاراتىن جاساپ جاتقان بىرنەشە ادامداردىڭ سۇلباسى ءتۇسىپ قالعان. وسى كادر كەزىندە «الاحۋ اكبار» دەگەن ۇران ەستىلەدى. تاعى ءبىر كادردە ورتەنىپ جاتقان عيماراتتىڭ اۋزىندا ءبىرى كىرىپ، ءبىرى شىعىپ جاتقان ادامداردىڭ توبى كورىنەدى. سوڭعى كادردەن جارىعى جوق عيماراتتىڭ ءىشىن ۆيدەوعا ءتۇسىرىپ جۇرگەن ادامداردىڭ ءوزارا ورىس تىلىندە سويلەسىپ جۇرگەنىن كورۋگە بولادى. ولار باسپالداقتا جاتقان ادامنىڭ جانىنا كەلگەن كەزدە كادر ءۇزىلىپ كەتەدى.
