دارىگەر: ۆاكسينا دەگەنىمىز - ۆيرۋستى ادام اعزاسىنا تانىستىرۋ

بۇل تۋرالى №6-اقتوبە قالالىق ەمحاناسىنىڭ مەنەدجەرى ادىلبەك يسمايلوۆ «اقتوبە» تەلەارناسىنىڭ تىكەلەي ەفيرىندە ايتتى، دەپ حابارلايدى قازاقپارات ءتىلشىسى.

№6-اقتوبە قالالىق ەمحاناسىنىڭ مەنەدجەرى ادىلبەك يسمايلوۆ كوروناۆيرۋس ينفەكسياسى، وميكرون شتامىمەن كۇرەس جۇمىسى مەن ۆاكسينا سالدىرۋ جايىندا «جەلىدە 103» باعدارلاماسىندا ايتىپ بەردى. ول الدىمەن ۆيرۋستىڭ شتامدارىنا توقتالىپ، اۋرۋدىڭ تارالۋ جولىن ءبولىستى.

«COVID-19 ۆيرۋستىڭ ءبىر ءتۇرى بولسا، ونىڭ شتامدارى ءارتۇرلى. «وميكروننىڭ» ەرەكشەلىگى - تەز تارالۋى. ماسەلەن ءبىز كوروناۆيرۋس ينفەكسياسىن جۇقتىرعان كەزدە ونىڭ سيمپتومدارى 14 كۇننىڭ ىشىندە كورىندى. كەيىن «دەلتا» شتامى كەلگەن كەزدە 7 كۇنگە قىسقاردى، ال «وميكروندا» ەكى ساعات پەن ەكى تاۋلىكتىڭ اراسى. نەىگىزى شتامدارعا بولگەنىمىزبەن، اۋرۋ بەلگىلەرىن اجىراتۋ وتە قيىن. جالپى ءبارىنىڭ كلينيكالىق بەلگىسى ۇقساس. العاشقىدا تۇماۋراتىپ، قامسىز جۇرگەندە اسقىنىپ كەتەدى. تەك ۆيرۋسولوگيالىق تەكسەرۋدەن سوڭ انىقتالىپ جاتادى. ءتيىمدى جولى پتر سىناما الىپ، ناقتىلاۋ. تۇسىنىكتى ەتىپ ايتار بولساق، اتا، بالا، نەمەرە دەپ تارقاتامىز. ۆيرۋس تا سونداي، بىرنەشە تۇرگە بولىنەدى. ونىڭ بارلىعى مۋتاتسيادان، ءبىر تۇردەن ەكىنشىسىنە اۋىسۋىنا بايلانىستى. وزگەرىس ادامزاتقا كەرى اسەرىن تيگىزىپ تۇر.

«وميكرون» شتامىندا ءولىم- ءجىتىم از بولعانىمەن، ادامنىڭ جۇمىس ىستەۋ قابىلەتى، ءوسىم ءسۇرۋ ساپاسىن تومەندەتەدى»، - دەدى ادىلبەك يسمايلوۆ.

ايتا كەتەيىك، ازىرگە اقتوبەدە «وميكرون» شتامى تىركەلگەن جوق. ءبىراق قامسىز وتىرۋعا بولمايدى. سەبەبى ەلىمىزدىڭ وزگە وڭىرىندە بار ۆيرۋستىڭ وبلىسقا دا جەتۋى ىقتيمال. «بىرىنشىدەن، ۆاكسينا سالدىرۋ كەرەك. ەكىنشىدەن، جەكە باس گيگيەناسىن ساقتاۋ ماڭىزدى. ماسكا تاعۋ، قولدا تازا ۇستاۋ، ادام كوپ جينالاتىن ورىندا ەرەجە ساقتاۋ، رەتى كەلسە وقشاۋلانۋ. ءبارىن ايتامىز، ءبىراق ءمان بەرىپ تىڭداي بەرمەيمىز. ماسكا تاعۋدىڭ ماڭىزىنا توقتالسام...

ينفەكسيا اۋا تامشىلارى ارقىلى تارايدى. ياعني، سويلەگەندە سىرتقا شىعادى. ادامنىڭ دنك جاسۋشاسىنا كىرىپ، داميدى دا ادامنان بولىنگەن سۇيىقتىق ارقىلى جان- جاققا تارايدى. ەگەر ماسكا تاعىپ جۇرسەك، سويلەسكەندە سىلەكەي تارامايدى. بەتپەردەنى سىرتتان ۆيرۋس جۇقتىرمايمىن دەپ ەمەس، وزگەگە جۇقتىرمايمىن دەپ تاققان ءجون. ەكى ساعاتتا ءبىر رەتتىك ماسكا ىلعال بولىپ، قورعاماي قالادى. سوندىقتان دەر كەزىندە الماستىرۋ ماڭىزجى. قولدى جۋۋ ءتارتىبى دە ماڭىزدى. سابىنداپ 2-3 مينۋت جۋۋ كەرەك. كوز، مۇرىن سياقتى كىلەگەي قاباتتى وسى ارقىلى دا ساقتايمىز»، - دەدى دارىگەر.

ادىلبەك يسمايلوۆ №6-قالالىق ەمحانادا ساپاعا جاۋاپتى. ناۋقاستىڭ دارىگەرگە شاعىمى، قىزمەت كورسەتۋ ۇقىپتىلىعى نازاردا. سونىمەن بىرگە ادامدارعا ەم ىزدەمەي، اۋرۋدىڭ الدىن الۋ جولىن تۇسىندىرەدى.

«ەگەر مەن ۆاكسينا سالدىرسام اۋىرمايمىن دەپ ويلايدى ادامدار. شىن مانىندە ولاي ەمەس. ۆاكسينا دەگەنىمىز - ادامنىڭ اعزاسىنا ۆيرۋستى تانىستىرۋ. «ۆيرۋس بار، ونىڭ شتامدارى مىناۋ، ەگەر سەن وسىنى بىلسەڭ، سەن ودان قورعانا الاسىڭ» دەپ اعزانى تانىستىرامىز. ۆيرۋستىڭ ءبىر بولشەگىن ەنگىزگەن كەزدە اعزادا يممۋنيتەت قالىپتاسا باستايدى. ماسەلەن، ءسىز بەيتانىس ورتاعا قوناققا باراسىز. كوپ جاعدايدا ءسىزدى ەلەمەي وتىرا بەرەدى. ءبىرى بەرىك، ەكىنشىسى سەرىك تانيتىن بولار دەپ وتىرا بەرەدى. ەگەر ءسىزدى دوسىڭىز اپارىپ، وزگەلەرمەن تانىستىرسا، باسقاشا قارىم- قاتىناس بولادى. ۆاكسينا دا سول سەكىلدى. اعزاعا ەنگىزىپ، تانىستىرىپ قويامىز. نەگىزى بارلىق ادامدا يممۋنيتەت بولادى. تەك كەيبىرى يممۋنيتەتتى باساتىن پرەپاراتتار قابىلدايدى. ماسەلەن، ونكولوگيالىق، جۇيەلىك اۋرۋعا قارسى ءدارى- دارمەك. ول كەزدە شىنىمەن دە يممۋنيتەت ءتۇسىپ، ۆيرۋستى كورمەي قالادى. ۆاكسينا بولسا، ۆيرۋس تۇسكەندە اعزا ءبىلىپ وتىرادى. كوبىنە ءبىز ۆيرۋستىڭ سالدارىمەن كۇرەسەمىز. ادام اعزاسىنىڭ قاي جەرى ءالسىز، سول جەرىنە سوعادى. ەگەر ناۋقاستىڭ جۇرەگى اۋىرسا، بۇيرەگى سىر بەرسە، سول جەرىنە ءوتىپ، السىرەتىپ كەتەدى. قازىر جۇرەك-قام تامىرى جۇيەسى، قانت ديابەتىمەن اۋىرعان ادامدار اراسىندا كوپ كەزدەسىپ جاتىر. پاندەميا باستالعاندا انىقتاۋ قيىن بولدى، قازىر زەرتتەۋ كۇشەيىپ، ەسىمىزدى جيىپ، باعىت- باعدارىمىزدى اجىراتىپ الدىق»، - دەدى ول.

اۆتور: التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى