تۋ ۇستاۋشى ابزال اجىعاليەۆ پەن ەكاتەرينا ايدوۆا تاريحي وبرازدا شىعادى

ق ر ۇلتتىق وليمپيادا كوميتەتى حابارلاعانداي، ولار ساق پاتشايىمى توميريس پەن قازاق باتىرىنىڭ كەيپىندە ەل الدىنا شىعادى. كوماندانىڭ تۋ ۇستاۋشىلارى كيەتىن كيىم نەگىزىنەن قازاقتىڭ ۇلتتىق ويۋ-ورنەگى «قوشقار ءمۇيىز» بەينەلەنگەن.

ايتا كەتەلىك، ورنەك ەلەمەنتتەرىن ديزاينەرلەر ءابىلحان قاستەيەۆ اتىنداعى مەملەكەتتىك ونەر مۇراجايىمەن بىرلەسىپ دايىندادى. توكيو-2020 وليمپياداسىندا دا وسىنداي قادام جاسالعان بولاتىن. ال جاپونياداعى جازعى ويىندارعا تۋ ۇستاۋشىلاردىڭ كيىمىن تىككەن ديزاينەر-مودەلەر ۆيولەتتا يۆانوۆا بەيجىڭ وليمپياداسى تۋ ۇستاۋشىلارىنىڭ فورماسىن دا دايىندادى.

«تۋ ۇستاۋشىلاردىڭ كوستيۋمى ءوز ەلىنىڭ ءداستۇرى مەن مادەنيەتىن پاش ەتەدى، سوندىقتان، ءبىزدىڭ باستى ماقساتىمىز دا وسى بولدى. قازاق حالقىنىڭ ەركىن رۋحىن ۇرپاقتان ۇرپاققا جالعاسىپ كەلە جاتقان باي تاريحىنان ارتىق ەشتەڭە بەينەلەي المايتىنى انىق. قازاقتىڭ باتىرلارى مەن توميريس پاتشايىمى تۋرالى اڭىزداردى ءبىز دە، بارشا الەم دە بىلەدى. كوستيۋمدى دايىنداۋ كەزىندە وسى ءبىر قىزىقتى وقيعالاردى باستى نازارعا الدىم»، - دەيدى ديزاينەر.

«ورنەكتىڭ نەگىزىندە بارشا الەم حالىقتارى ەجەلدەن قۇرمەتتەيتىن، ەڭ مىقتى ەنەرگيا كوزى سانالاتىن كۇن جاتىر. بۇل تەك مىقتىلارعا - جەڭىمپازدارعا باعىتتالعان. ءبىزدىڭ باستى باتىرلارىمىز - سپورتشىلار، وليمپياداشىلار تارتىپكە بەرىك، ماقساتى انىق، ءوز ارماندارىنا سەنىمدى قادام باسقان، بالا كۇنىنەن بەرى باستى ماقساتىنا جەتۋ ءۇشىن ەڭبەكتەنگەن جاندار»، - دەپ اتاپ ءوتتى ول.

قازاقستاندىق مودەلەردىڭ ايتۋىنشا، ويىننىڭ اشىلۋ سالتاناتىنا ارنالعان فورمانى دايىنداۋ قيىنعا سوققان. سەبەبى، جۇمىس كەزىندە كليماتتىق ەرەكشەلىكتەردى دە ەسكەرۋ قاجەت. ايەل ادامعا ارنالعان كوستيۋم پالتو جانە قولمەن ورنەكتەلگەن بىرەگەي ساۋكەلەدەن تۇرادى. بۇل كوستيۋمدى قازاقستاندىق شەبەرلەر 3 اي بويى، ءاربىر سانتيمەترىن ءوز قولىمەن دايىنداعان. كوپتەگەن انتيكالىق اۆتورلاردىڭ شىعارمالارىندا كەزدەسكەن ءارى مىڭداعان جىلدار بويى اڭىزعا اينالعان ساق پاتشايىمى وسى تۋىندىعا ارقاۋ بولعان. ايەل ادام كوستيۋمىندەگى «قوشقار ءمۇيىز» ورنەگى قورشاعان ورتامەن ۇيلەسىم تاپقان، ومىرگە تالپىنعان، قۇنارلىلىق پەن مولشىلىقتى بەينەلەيدى.

ەر ادامنىڭ كوستيۋمىندەگى نەگىزى ەلەمەنت - قالقان ەرلىك پەن باتىرلىقتىڭ سيمۆولى. ەكى كوستيۋمنىڭ دە استارى تەرەڭ. باستى ءتۇس بولىپ قارا جانە «جەڭىمپازداردىڭ ءتۇسى» سانالاتىن التىن ءتۇس تاڭدالدى. قارا سۋ جولبارىسىنىڭ جىلى دا ەسەپكە الىندى.

ويتكەنى، وليمپيادانىڭ باستالۋى تاپ وسى جىلدىڭ ەنۋىمەن سايكەس كەلىپ وتىر. قازاقستاندىق اتلەتتەر كوستيۋمنىڭ تولىق كوڭىلدەن شىعاتىنىن كيىمدى ولشەگەن ساتتەن-اق ايتىپ كەلەدى.

ەسكە سالايىق، ابزال اجىعاليەۆ ەكىنشى وليمپيادا قاتارىنان ەلىمىزدىڭ تۋ ۇستاۋشىسى اتانىپ وتىر.

«ءبىزدىڭ كوستيۋمدەرىمىز بىرەگەي ءارى راسىمەن دە مىقتى ەنەرگەتيكا سەزىلەدى. مۇنداي ماڭىزدى ءسات ەكاتەرينا ەكەۋمىزگە سەنىپ تاپسىرىلعانىنا قۋانىشتىمىن. ەل نامىسىن وليمپيادادا قورعاۋ ۇلكەن ابىروي، ال تۋىڭدى الىپ شىعۋ ارقىلى جاۋاپكەرشىلىك ودان ءارى ارتا تۇسەدى. بۇل سەزىمدى جەتكىزۋ مۇمكىن ەمەس!»، - دەيدى ابزال اجىعاليەۆ.

ەسكيزدەن باستاپ سوڭعى سىرۋعا دەيىنگى پروتسەسس ءۇش ايعا سوزىلدى. بۇل ونەر تۋىندىسىن دايىنداۋعا 20-دان اسا شەبەر جۇمىلدىرىلدى، ونىڭ ىشىندە 2 كونسترۋكتور، 4 تىگىنشى، سۋرەتشى جانە 8 كەستەشى بار. كيىمدى بەزەندىرىپ تۇرعان بارلىق كەستە التىن، كۇمىس جىپتەرمەن جانە مونشاقتارمەن قولدان جاسالدى.

«كوستيۋمدەردىڭ ەسكيزى وليمپيادانىڭ اشىلۋ سالتاناتىنا دەيىن قۇپيا ءۇستالدى. سوندىقتان، كوستيۋمنىڭ قانداي بولاتىنى مەن ءۇشىن ەرەكشە قىزىق ەدى. كوستيۋمنىڭ كەرەمەت شىعاتىنىنا كۇمانىم بولعان جوق. الايدا، بۇل كوستيۋم مەن ويلاعاننان دا ارتىق دايىندالىپتى! ۇ و ك پەن وسى ءبىر سۇلۋلىقتى قولدان جاساعان بارلىق شەبەرلەرگە ۇلكەن العىسىمدى بىلدىرەمىن. بارلىق جان-دۇنيەسىن سالىپ ىستەگەن دۇنيە ەكەنى سەزىلىپ تۇر. قازاقستاندى وسىنداي دەڭگەيدە تانىتۋ ءۇشىن بۇدان اسقان نە ويلاپ تابۋ كەرەكتىگىن بىلمەيمىن»، - دەدى ەكاتەرينا ايدوۆا.

ايتا كەتەلىك، وليمپيادا ويىندارىندا سپورتتىڭ 8 تۇرىنەن 34 سپورتشى باق سىنايدى.

قازىر اق وليمپيادانىڭ اشىلۋ ءراسىمى باستالىپ كەتتى.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى