وزبەك فۋتبولى قالاي دامىپ جاتىر؟

بۇعان ەۋروپالىق «رەال مادريد»، «يۋۆەنتۋس» سەكىلدى فۋتبول كلۋبتارىنىڭ ارنايى اكادەميالارى دا قوسىلدى. ءبىراق ورىندالماي كەلە جاتقان ەڭ باستى ماقسات بار. وزبەكستاننىڭ فۋتبول قۇراماسى الەمدىك دودالاردا ءالى باق سىناعان ەمەس. بۇعان نە سەبەپ؟

وزبەكتىڭ فۋتبولى دەگەندە ەڭ الدىمەن تاشكەنتتىڭ «پاحتاكور» كلۋبى ويعا ورالادى. ول كەڭەستىك رەسپۋبليكالار وداعىنىڭ چەمپيوناتى ارقىلى تانىمال بولعان ۇجىم. اسىرەسە، الماتىلىق «قايراتتىڭ» جانكۇيەرلەرىنە جاقسى تانىس. بۇل ەكى كلۋبتىڭ اراسىنداعى كەزدەسۋلەر ورتالىق ازيانىڭ باستى دەربيىنە اينالعان دەسەدى. قازىر سول پاحتاكور دامۋدىڭ جاڭا كەزەڭىنە اياق باستى.

كلۋبتى وركەندەتۋگە وزبەكتىڭ بەلگىلى بيزنەسمەندەرى اتسالىسىپ جاتىر. ءتىپتى، كەلەشەكتە جاڭا ستاديون سالىپ بەرۋگە ۋادە ەتكەن. «قايرات» پەن «پاحتاكور» اراسىنداعى تارتىستى دەربيدىڭ وتپەگەنىنە 30 جىلدان استام ۋاقىت بولدى. بۇل ەكى ۇجىمنىڭ جولى 1990 -جىلدان بەرى تۇيىسپەگەن. قازاقستاندىق كوماندا UEFA شەڭبەرىندەگى جارىستارعا، ال وزبەكستاندىق كلۋب ازيا قۇرلىعىنداعى باسەكەلەرگە قاتىسادى. ۇلتتىق قۇرامالار دا ءجيى جولىعا بەرمەيدى. دەگەنمەن، جاسىل الاڭنان تىس باسەكەلەستىك بار.

وزبەكستان وسى ۋاقىت ارالىعىندا 8 بىردەي ستاديون سالدى، زاماناۋي ينفراقۇرىلىم قالىپتاستىردى. ەڭ ۇلكەنى تاشكەنتتەگى كەشەن. 35 مىڭ جانكۇيەر سيادى.

نارزۋللا سايدۋللايەۆ، سپورت جۋرناليسى:

- فۋتبول ستاديوندارىن سالۋ مەملەكەتتىك دەڭگەيدەگى باعدارلاماعا ەندى. پرەزيدەنتتىڭ وسى باعىتتا ارنايى قارارى قابىلداندى. 2010 -جىلدان بەرى بۇگىنگە دەيىن 3 ستاديون سالىندى. تاعى بىرنەشەۋى كۇردەلى جوندەۋدەن ءوتتى. ال ەسكى الاڭداردا فۋتبول ويناۋعا تىيىم سالىندى. كلۋبتار وسى تالاپقا باعىنىپ، قولدانىستاعى ينفراقۇرىلىمىن جاڭارتتى.

وزبەكستان فۋتبول ليگاسى دا كاسىپقوي كلۋبتارعا زاماناۋي ستاديون سالۋدى مىندەتتەيدى. تەك ينۆەستور ەسەبىنەن. مەملەكەت قارجىسىن جۇمساۋعا جول بەرمەيدى. جالپى، ەلدە قازىنا قاراجاتىنىڭ كاسىبي فۋتبولعا باعىتتالۋى سيرەك جاعداي. تاعى ءبىر تالاپ - ءاربىر كوماندادا بالالار اكادەمياسى بولۋى ءتيىس. ونسىز كوماندالار چەمپيوناتقا قاتىسپايدى.

زوحيرجون اكرامحانوۆ، وزبەكستان كاسىبي فۋتبول ليگاسى ليتسەنزيالاۋ ءبولىمىنىڭ باسشىسى:

- وزبەكستاننىڭ كاسىبي فۋتبول كلۋبتارىنا ىشكى بىرىنشىلىككە قاتىسۋ تالابىندا كوماندا جانىنان بالالار مەن جاسوسپىرىمدەر مەكتەبىن اشۋ مىندەتى انىق كورسەتىلگەن. قازىر ەڭ جوعارى ليگادا ونەر كورسەتەتىن جانە ەكىنشى دەڭگەيلى چەمپيوناتتا وينايتىن كوماندالاردا وسىنداي اكادەميا بار. ولاردىڭ ءبارى جەكەمەنشىك. مەملەكەت تاراپىنان قارجىلاندىرىلمايدى.

ەنگىزىلگەن وزگەرىستەر وزبەك فۋتبولىن دامىتۋعا سەپ. جەرگىلىكتى كلۋبتار قازىردىڭ وزىندە ازيا جارىستارىندا ۇزدىكتەر قاتارىنان كورىنىپ ءجۇر. ال اياقدوپ شەبەرلەرى ەۋروپانىڭ ازۋلى كوماندالارىندا وينايدى. ءبىراق ۇلتتىق قۇراما ويىنشىلارىنىڭ الەم بىرىنشىلىگىنە قاتىسۋ ارمانى ءالى كۇنگە ورىندالماي كەلەدى. ولار بيىل دا قاتاردا وتەتىن الەم چەمپيوناتىنان سىرت قالدى. «بۇل جولى ساتسىزدىكتەن گورى، شەبەرلىك جەتىسپەدى»، - دەدى ماماندار.

نارزۋللا سايدۋللايەۆ، سپورت جۋرناليسى:

- ازيا قۇرلىعىندا ءبىزدىڭ قۇراما 12- ورىندا تۇر. كەيىنگى جىلدارى كورسەتكىشىمىز ناشارلاپ بارادى. ءبىراق 2026 -جىلى الەم بىرىنشىلىگىنە بارۋىمىز مۇمكىن. ول كەزدە ازيا ايماعىنان مۋنديالگە قاتىساتىن كوماندالار سانى ارتادى. سول دوداعا قاتىسۋ مۇمكىندىگىمىز جوعارى. قازىر ۇلتتىق قۇرامامىزدىڭ باس باپكەرى اۋىستى. تاجىريبەلى، مىقتى مامان كەلدى.

جالپى، تاۋەلسىزدىك جىلدارى وزبەكستاندا سپورت تۇرلەرىنىڭ ىشىندە فۋتبولعا كوبىرەك كوڭىل بولىنگەنى بايقالادى. وسى سالانىڭ ينۆەستيتسيالىق تارتىمدىلىعىن ارتتىرۋ ءۇشىن بۋكمەكەرلىك كەڭسەلەردىڭ قىزمەتىنە رۇقسات بەرۋ جايى قاراستىرىلىپ جاتىر. كەيىن ودان تۇسكەن سالىقتىڭ 45 پروتسەنتى بالالار فۋتبولىنا جۇمسالادى. مەملەكەت ەلدىڭ بيزنەسمەندەرىن دە وسىعان ۇندەيدى. تاياۋدا وزبەكتىڭ بەلگىلى باي- ماناپتارىنىڭ ءبىرى «پاحتاكور» ستاديونىن جاڭارتۋعا 100 ميلليون دوللار قاراجات بولەتىنى بەلگىلى بولدى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى