ەلىمىزدە باسپانا باعاسى ارزانداي ما - مامان جاۋابى
كەيىنگى ءبىر جىلدا ەلىمىزدىڭ تۇرعىن ءۇي نارىعىن بۇرىن- سوڭدى بولماعان قىمباتشىلىق جايلادى. زەينەتاقى قورىنداعى قارجىنى پايدالانۋ قۇقىعى بەرىلگەن بويدا، باعا بىردەن 10-12 پايىزعا ءوستى. كوپتەگەن وتانداستارىمىز ءۇيدىڭ باعاسى ۋشىعىپ تۇرعانىن ايتادى. جاقىندا عانا باسپانا ساتىپ العان الماتىلىق تۇرعىن پاتەر باعاسى شارىقتاپ كەتكەنىن تىلگە تيەك ەتتى.
«مەن وسىدان 15 كۇن بۇرىن الماتىنىڭ ورتالىعىنان ەكى بولمەلى پاتەر ساتىپ الدىم. ءۇي قولدانىسقا 1970 -جىلى بەرىلگەن. ياعني، ەسكى. ءبىراق، ول باسپانا باعاسىنا ەش اسەر ەتپەدى. جازدا ول پاتەردىڭ باعاسى 17 ميلليون تەڭگە بولسا، قازىر 25 ميلليون تەڭگەگە جەتتى. يەسىمەن ساۋدالاسىپ جاتىپ، قولما-قول اقشاعا 23 ميلليون تەڭگەگە ساتىپ الدىم. الماتىدا پاتەر باعاسى شارىقتاپ تۇر»، - دەيدى التىن بازارقۇلوۆا.
قازاقستاننىڭ بىرىككەن رەلتورلار قاۋىمداستىعىنىڭ پرەزيدەنتى لاريسا ستەپانەنكو ءۇي باعاسىنا قاتىستى ءوز ويىن ايتتى.
«ەلدە قاڭتار وقيعاسىنان كەيىنگى جاعداي بىرتىندەپ تۇزەلىپ كەلەدى. ادامدار قالىپتى ومىرگە قايتا ورالدى. ينفلياتسياعا بايلانىستى پاتەر باعاسى جىل سايىن ورتا ەسەپپەن %10 عا قىمباتتاپ جاتىر. ساتۋشىلار باعانى شىنىمەن كوتەردى. ءاربىر ساتۋشى باسپانانى مەيىلىنشە قىمباتقا وتكىزگىسى كەلەدى، ساتىپ الۋشى كەرىسىنشە ارزانعا ىزدەيدى. بۇل زاڭدى قۇبىلىس. الايدا سۇراعان باعاعا سيرەك وتەدى. قازىر زەينەتاقى جيناعىنىڭ جەتكىلىكتى شەگى ارتتى. سوندىقتان باسپانا باعاسى ارزاندايدى»، - دەيدى لاريسا ستەپانەنكو. سپيكەردىڭ سوزىنشە، قازىر پاتەرلەردىڭ قىمباتتاۋىنا ايقىن سەبەپتەر جوق.
«باسپانا باعاسىن كوتەرۋگە ەشقانداي سەبەپ كورىپ تۇرعانىم جوق. ويتكەنى سۇرانىس نارىقتاعى ۇسىنىستان الدەقايدا تومەن. جازعا قاراي، ادەتتەگىدەي، ەلدە حالىقتىڭ بەلسەندى كوشى- قونى باستالادى. سول ۋاقىتتا ساتىلىمعا كوپ باسپانا شىعارىلادى. الايدا، بۇل باعانى نەگىزسىز وسىرۋگە اكەلمەۋى كەرەك. سەبەبى، حالىقتىڭ جالاقىسى وسكەن جوق. جۇمىس ورىندارىندا قىسقارتۋ ءجۇرىپ جاتقانىن كورىپ وتىرمىز. مەملەكەت تۇرعىن ءۇي ساتىپ الۋ ءۇشىن بانكتىك باعدارلامالاردى ءالى شىعارعان جوق»، - دەيدى ول.
سونىمەن قاتار، ول جازعا قاراي ءۇي يەلەرى ساتىلىمعا قويعان باسپانا باعاسىن تۇسىرەتىنىن اتاپ ءوتتى.
«بىزدە باسپانا ساتۋشىلار كوپ، ساتىپ الۋشىلار الدەقايدا از. سوندىقتان ارزانداۋى كەرەك. ءۇيىن شىنىمەن دە ساتقىسى كەلەتىندەر، باعاسىن تۇسىرەدى»، - دەپ قورىتىندىلادى ءسوزىن قازاقستاننىڭ بىرىككەن رەلتورلار قاۋىمداستىعىنىڭ پرەزيدەنتى لاريسا ستەپانەنكو.
اۆتور: الما مۇقانوۆا
