قىرعىزستاننان ەلىمىزگە مالىمدەلمەگەن تاۋارلار اكەلۋ فاكتىسى ارتىپ وتىر
بۇل جايىندا ق ر ق م مەملەكەتتىك كىرىستەر كوميتەتىنەن ءمالىم ەتتى، دەپ حابارلايدى قازاقپارات ءتىلشىسى.
«وسى جىلدىڭ باسىنان بەرى قىرعىزستاننان قازاقستان مەن رەسەيگە حالىق تۇتىناتىن تاۋارلاردىڭ جۇك اعىنى 3 ەسەگە ۇلعايۋى بايقالادى. جۇك اعىنىنىڭ ۇلعايۋىمەن قاتار مالىمدەلمەگەن، ياعني جاسىرىن، نەگىزىنەن قىتاي ءوندىرىسىنىڭ تاۋارلارى سانى ەداۋىر ۇلعايدى. كورسەتىلگەن فاكتىلەردىڭ الدىن الۋ ماقساتىندا مەملەكەتتىك كىرىستەر ورگاندارى تاۋەكەلدەردى باسقارۋ جۇيەسىن قولدانادى. ونىڭ نەگىزىندە تاقىرىپتىق سالىقتىق تەكسەرۋلەر جۇرگىزىلەدى»، - دەپ اتاپ وتەدى كوميتەتتەن.
مىسالى، ۆەدومستۆو دەرەگىنشە، 2022 -جىلعى 3-اقپاندا تاقىرىپتىق سالىقتىق تەكسەرۋ جۇرگىزۋ بارىسىندا قىرعىز رەسپۋبليكاسىنىڭ جۇك اۆتوكولىك قۇرالىندا 3,6 مىڭنان استام مالىمدەلمەگەن قىمبات جانە سالىق سالىناتىن تاۋارلار انىقتالدى. ونىڭ ىشىندە قىتاي ءوندىرىسىنىڭ قۇجاتتارى مەن تاڭبالارى جوق 98 بىرلىك تەرى بۇيىمدارى (توندار) تابىلدى.
«تاۋارعا ىلەسپە قۇجاتتاردا تونداردىڭ مالىمدەلمەۋى ە ا ە و ەلدەرىندە مىندەتتى تۇردە تەرى بۇيىمدارىن تاڭبالاۋدىڭ ەنگىزىلۋىنە بايلانىستى دەپ بولجانۋدا. سونداي- اق تەكسەرۋ جۇرگىزۋ بارىسىندا تاۋارعا ىلەسپە قۇجاتتاردا كورسەتىلمەگەن تانىمال برەند تاۋارلارى انىقتالدى. وسى فاكتىلەر بويىنشا ماتەريالدار ءتيىستى ءىس- شارالار قابىلداۋ ءۇشىن قۇقىق قورعاۋ ورگاندارىنا جىبەرىلەدى. اتالعان تاۋارلاردى ە ا ە و اۋماعىندا وتكىزۋدىڭ زاڭدىلىعىن بەلگىلەۋ ماقساتىندا قىرعىز رەسپۋبليكاسىنىڭ قۇزىرەتتى ورگاندارىنا سۇراۋ سالىنادى. بيزنەس سۋبەكتىلەرى تاراپىنان مۇنداي ارەكەتتەر ە ا ە و بويىنشا ارىپتەس ەلدەردىڭ بيۋدجەتتەرىنە زالال كەلتىرەتىنىن اتاپ وتكەن ءجون. وسىعان بايلانىستى باقىلاۋ كۇشەيتىلەتىن بولادى»، - دەلىنگەن تاراتىلعان اقپاراتتا.
