بولات اقشولاقوۆ: قازاقستاندا اەس سالۋ تۋرالى ناقتى شەشىم شىققان جوق
«جۋىقتا رەسەيلىك «روساتوم» مەملەكەتتىك كورپوراتسياسىنىڭ باس ديرەكتورى الەكسەي ليحاچيەۆ قاڭتار وقيعالارى ءوز كومپانياسىنىڭ قازاقستانمەن اتوم ەلەكتر ستانساسىن سالۋ جونىندەگى ارىپتەستىگىنە اسەر ەتپەيتىنىن مالىمدەدى. بۇل جوبا قازىر قانداي ساتىدا ەكەنىن، ا ە س قۇرىلىسى بويىنشا سوڭعى كەلىسىمدەر تۋرالى ايتىڭىزشى»، - دەپ سۇرادى ب ا ق وكىلى ەنەرگەتيكا مينيسترىنەن.
«شىن مانىندە بۇل وقيعالاردىڭ اراسىندا ەشقانداي بايلانىستىڭ بولۋى دا مۇمكىن ەمەس. ەكەۋى ەكى ءتۇرلى ماسەلە نەگىزى. اتوم ستانساسىن سالۋ وتە نازىك ماسەلە. سوندىقتان «سالامىز با ، الدە سالمايمىز با» دەگەن سۇراق بويىنشا ازىرگە ەشقانداي شەشىم جوق»، - دەپ ءتۇسىندىردى بولات اقشولاقوۆ.
ونىڭ سوزىنشە، قازاقستاننىڭ 2035 -جىلعا دەيىنگى ەنەرگەتيكالىق بالانس بولجامىندا قۋات كوزىنىڭ ءتۇرلى بالاما جولدارىنا باسىمدىق بەرۋ قاراستىرىلىپ
«كۇن تارتىبىنە «جاسىل» ساياسات شىققانىنا بايلانىستى كومىر ەنەرگياسىنىڭ گەنەراتسياسىن كەڭەيتە المايمىز. ويتكەنى ەكولوگيالىق تۇرعىدا تازا كوز دەپ ايتۋعا كەلمەيدى. ال گاز الدەقايدا تازا وتىن بولعانىمەن، ول دا سارقىلادى. ونىڭ ۇستىنە گاز سالاسىن دامىتۋ بويىنشا باسقا دا مىندەتتەرىمىز بار. گاز جانارماي عانا ەمەس، كوپتەگەن وندىرىستەر ءۇشىن وتە جاقسى شيكىزات بولا الادى. ونىڭ ۇستىنە قاراپايىم تۇرعىندارعا كەرەك. سونىڭ ءبارىن ەسكەرسەك، اتوم ستانساسى وسىنداي كوپ جولدىڭ ءبىرى عانا»، - دەدى ۆەدومستۆو باسشىسى.
سونداي- اق، ول اەس سالۋ جوباسى حالىقتىڭ پىكىرىن ەسكەرە وتىرىپ قانا قابىلدانۋى مۇمكىن ەكەنىن باسا ايتتى.
«بۇل دا قاراستىرىلۋى مۇمكىن. ءبىراق تاعى دا ايتايىن، بۇل وتە نازىك ماسەلە جانە تىڭعىلىقتى زەردەلەۋدى قاجەت ەتەدى. ول زەرتتەۋگە ءبىرىنشى كەزەكتە قوعامدى تارتۋ كەرەك. ازىرگە قازاقستاننىڭ قانداي دا ءبىر ۋچاسكەسىندە ستانسيا سالۋ جونىندە ايقىن شەشىم جوق»، - دەدى مينيستر.
اۆتور: ەسىمجان ناقتىباي
