كورولدىك بالا كۇتۋشىلەردى وقىتاتىن كوللەدج جايلى نە بىلەمىز؟

ال كورولدىك وتباسىدا بالا كۇتۋشى بولۋ ءۇشىن ارنايى ءبىلىم قاجەت. بۇگىنگى ماتەريالدا ەڭ كوپ سۇرانىسقا يە بالا كۇتۋشىلەردى وقىتاتىن نورلاند-كوللەدج جايلى ايتپاقپىز.

نورلاند-كوللەدج قالاي پايدا بولدى؟

ونى 1892 -جىلى ەميلي ۋورد اشتى. ارحيۆتان ەميلي ۋوردتىڭ مەكەمەنى اشقانداعى ماقساتىن جازعان قولجازباسى تابىلعان: «قوعامعا بالالارعا ارنالعان كاسىبي بالا كۇتۋشىلەردى جالداۋعا مۇمكىندىك بەرۋ» .

نورلاند – ۇلى بريتانياداعى وسىنداي العاشقى وقۋ ورنى. باستاپقىدا ونىڭ بالالارمەن جۇمىس جاساۋداعى بازالىق پرينتسيپتەرى مەكتەپكە دەيىنگى تاربيە جۇيەسىن ويلاپ تاپقان نەمىس پەداگوگى فرەدريح فرەبەلدىڭ ۇستانىمدارىنا نەگىزدەلدى.

وقۋ ورنىنىڭ ۇرانى: «كىشكەنتاي ادامدارمەن ۇلكەن مانساپ». شىنىمەن دە، نورلاندتى اياقتاعاندار كەز كەلگەن وتباسىعا بالا كۇتۋشى بولىپ ورنالاسا الادى. ەميلي ۋورد وتباسىداعى بالا كۇتۋشىنىڭ ورنىن جانە نە ءۇشىن اتا-انا ونى جالداۋ كەرەگى جايلى بىلاي دەگەن:

«بالا كۇتۋشى انامەن بىرگە جۇمىس ىستەيدى، ءبىراق ول ونىڭ ورنىن اۋىستىرمايدى. انا ءۇشىن بالا كۇتۋشىنىڭ بولۋى - بالالاردى كۇتۋگە قاتىستى شارشاتاتىن جاعدايلاردان ارىلۋ جانە دەمالۋعا ۋاقىت ءبولۋ».

XXI عاسىر بالا كۇتۋشىلەرىنىڭ كودەكسى

نورلاندتا ستۋدەنتتەر مەن تۇلەكتەر قاتاڭ ساقتاۋى ءتيىس ەرەجەلەردەن تۇراتىن ءوز كودەكسى بار. بۇل كودەكس زامانعا ساي وزگەرىسكە ەنىپ، وعان جاڭا پۋنكتتەر قوسىلىپ تۇرادى. ول بالا قۇقىعىن قۇرمەتتەۋدەن جانە ونىڭ وتباسىسىنىڭ دارالىعى مەن قۇندىلىعىن مويىنداۋدان باستالادى.

سونداي-اق، كودەكستە 100 جىل بۇرىن وزەكتى بولماعان پۋنكتتەر دە بار: بالا كۇتۋشى بالالاردى سۋرەتكە تۇسىرۋگە بولا ما، تاربيەشىلەر الەۋمەتتىك جەلىلەردە وزدەرىن قالاي ۇستاۋ كەرەك، ولارعا سىيلىق الۋعا بولا ما جانە ت. ب.

بالا كۇتۋشىلەرگە ارنالعان كوللەدجدە نە ۇيرەتەدى؟

ستۋدەنتتەر نورلاندتا ءۇش جىل وقيدى. ونىڭ ءارقايسىسى 3 سەمەستردەن تۇرادى. ستۋدەنتتەر ءارتۇرلى پارامەترلەرگە قاتىستى باعالانادى: ەسسە، پرەزەنتاتسيا، جوبالىق جۇمىستار. وقۋ سوڭىندا ديپلوم الادى. نورلاندتا ستۋدەنتتەر پەداگوگيكالىق ءبىلىمنىڭ ستاندارتتى باعدارلامالارىن، فيزيولوگيا كۋرستارىن، بالا دامۋىنىڭ ەرەكشەلىكتەرىن، پسيحولوگيا، العاشقى كومەك كورسەتۋ، تاماقتانۋ جانە بايلانىس ساباقتارىن وتەدى. سونداي-اق ولار بولاشاق قامقورلىققا الىنعان بالالارىنىڭ ومىرىمەن بىرگە جۇرەتىن بارلىق نارسەنى ۇيرەنەدى. مىسالى: ەكسترەمالدى جۇرگىزۋ، ءوزىن-ءوزى قورعاۋ، كيدنەپپينگ (بالا ۇرلاۋ) شارتىنداعى ءىس-ارەكەت جانە جالپى قاۋىپسىزدىك. بۇل ساباقتاردى بۇرىنعى اسكەري بارلاۋ وفيتسەرلەرى جۇرگىزەدى.

كوللەدجدىڭ بارلىق ستۋدەنتتەرى قوسىمشا ماكاتون - سويلەۋدەن، ىم-يشارادان جانە بەلگىلەردەن تۇراتىن تىلدىك باعدارلامانى وقي الادى. بۇل «ءتىلدى» داۋنا سيندرومى بار نەمەسە ەستۋ قابىلەتى ناشار ادامدارمەن سويلەسۋدە قولدانۋعا بولادى. ماكاتوندى ⅩⅩ عاسىردىڭ 70-جىلدارى ۇلى بريتانيادا لوگوپەد ءارى دەفەكتولوگ مارگارەت ۋوكەر ويلاپ تاپتى، ال قازىر ونى الەم بويىنشا قولدانادى.

بالا كۇتۋشىلەر فورماسى

فورما نورلاندتا ەرەكشە ورىن الادى. بۇل جەردە فورمانى ەرەكشەلىك بەلگىسى رەتىندە ويلاپ تاپقان جانە ول ءالى كۇنگە دەيىن سول ءرولىن ءساتتى ورىنداپ كەلەدى.

ەميلي ۋورد ستۋدەنتتەر مەن تۇلەكتەردى باسقا ءۇي قىزمەتكەرلەرىمەن شاتاستىرماس ءۇشىن ولار فورما كيۋ كەرەك دەپ شەشكەن. كوللەدج ەرەجەسى بويىنشا، فورما - مىندەتتى ەلەمەنت، ەرەكشەلەيتىن بەلگى، مەدبيكەلەر فورماسىنا ۇقساس كيىم. بالا كۇتۋشىگە جۇمىس بەرۋشى وتباسى ونىڭ ارنايى فورمامەن جۇرگەنىن قالاماعان كەزدە عانا ول باسقا كيىم كيە الادى. 2013 -جىلى نورلاندتا جاڭا فورما ۇسىنىلدى.

تۇلەكتەر جۇمىسقا قالاي تۇرادى؟

كوللەدجدە تۇلەكتەردىڭ جۇمىسقا تۇرۋىمەن اينالىساتىن Norland Agency اگەنتتىگى بار. بۇل اگەنتتىك تەك وسى كوللەدجدى اياقتاعان تۇلەكتەرمەن جۇمىس ىستەيدى. ەگەر ءسىز نورلاند- كوللەدجدى اياقتاماعان بولساڭىز، ولاردىڭ قىزمەتىنە جۇگىنۋ مۇمكىن ەمەس.

اقپارات دەرەككوزى: massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى