الماتىداعى قارۋ دۇكەندەرىن كاسىبي ماماندار توناعان
بۇل تۋرالى قالالىق پوليتسيا دەپارتامەنتىنەن ءمالىم ەتتى، دەپ حابارلايدى قازاقپارات ءتىلشىسى.
«تورلاردى كولىكتەرمەن جۇلىپ، ارنايى دايىندالعان قۇرىلعىمەن سىندىردى. ولاردا ءبارى بولدى. قولعاپتارمەن جۇمىس ىستەدى، ال قولعاپتار - ارنايى. مۇندا كاسىبي ماماندار جۇمىس ىستەدى. ويتكەنى دۇكەن كاسىبي تۇردە اشىلعان. ولاردا كوپ ۋاقىت بولمادى، سول سەبەپتى تورلاردى سىندىرا باستادى»، - دەدى «ارما-56» مامانداندىرىلعان قارۋ- جاراق دۇكەنىنىڭ ديرەكتورى الەكساندر الەكسەەنوك.
پوليتسيا دەپارتامەنتىنىڭ مالىمەتىنشە، قازىرگى ۋاقىتتا قالادا قارۋدى، ونىڭ ىشىندە قارۋ- جاراق دۇكەندەرىنەن ۇرلانعانداردى ىزدەستىرۋ جانە تاركىلەۋ، سونداي- اق قالاداعى قىلمىستىق احۋالدى جاقسارتۋعا باعىتتالعان «قۇقىقتىق ءتارتىپ» ءىس- شاراسى ءوتىپ جاتىر.
«وسى دۇكەندەردىڭ قويمالارىندا سورەلەرگە قويىلعان قولدانىستا ەمەس قارۋلاردىڭ قۇرامداس بولىكتەرى، سونداي- اق اتۋعا جارامدى قارۋلار دا ساقتالعان. كەيبىر دۇكەندەردەگى قىلمىسكەرلەر اتۋعا جارامدى قارۋعا جەتىپ ۇلگەرگەن، سودان كەيىن ولاردى ۇرلاپ كەتكەن. قولدانىستا ەمەس قارۋدى، ەگەر قۇرامداس بولىكتەرى بار بولسا، بەيبىت تۇرعىندار مەن قۇقىق قورعاۋ ورگاندارىنىڭ قىزمەتكەرلەرىنە قارسى قولدانىلۋى مۇمكىن ەكەندىگىن ەسكەرتەمىن. ازاماتتاردان زاڭسىز قارۋ ساقتاۋ فاكتىلەرى انىقتالسا نەمەسە تابىلسا، ءوز ەركىمەن تاپسىرۋلارىن سۇرايمىز. قارۋدى ءوز ەركىمەن تاپسىرۋ قىلمىستىق جاۋاپكەرشىلىكتەن بوساتادى»، - دەدى الماتى قالالىق پ د اكىمشىلىك پوليتسيا باسقارماسى باستىعىنىڭ ورىنباسارى بولاتبەك باياتانوۆ.
