الەمنىڭ ءبىرقاتار ەلىندە ميگرانتتار ماسەلەسى قايتا ۋشىقتى

چيليدىڭ يكيكە قالاسىندا ميگرانتتار ماسەلەسى ۋشىقتى. ايماقتاعى قاۋىپسىزدىكتى رەتتەۋ ءۇشىن بيلىك وكىلدەرى وڭىرگە قوسىمشا پوليتسيا اتتاندىردى. الداعى ۋاقىتتا ەل اۋماعىندا تۇرۋعا ىقتيارحاتى جوق ازاماتتاردىڭ ءبارى شەكارادان شىعارىلادى. بۇل شارا ناۋرىزدىڭ ورتاسىنا دەيىن اياقتالۋى ءتيىس.

رودريگو دەلگادو، چيلي ىشكى ىستەر ءمينيسترى:

- بۇگىن پوليسيا قىزمەتكەرلەرىنىڭ العاشقى لەگى كەلەدى. ولار قالاداعى قاۋىپسىزدىكتى ساقتاۋعا جۇمىلدىرىلادى. چيليدە زاڭسىز جۇرگەن شەتەلدىكتەر ەلدەن شىعارىلادى. ولارعا ءتيىستى حابارلاما جىبەرىلەدى. ميگرانتتاردىڭ جاپپاي اعىلۋىنان چيليدە قىلمىس سانى كۇرت ارتىپ كەتتى.

ۇرلىق پەن توناۋ دەرەگىنىڭ كوپتىگى سونشا جەرگىلىكتى بيزنەس ايتارلىقتاي زارداپ شەككەن. وسىعان بايلانىستى جۋىردا يكيكەدەگى كاسىپكەرلەر كوشەگە شىعىپ، ميگرانتتاردىڭ قونىستانۋىنا نارازىلىق ءبىلدىردى. شەرۋگە شىققان 4 مىڭداي ادام بيلىكتەن كەلىمسەكتەردىڭ اعىلۋىن توقتاتۋ ءۇشىن ءتيىستى شارا قابىلداۋدى تالاپ ەتتى.

قاقاعان ايازدا ليۆياداعى بوسقىندار قيىن جاعدايدا قالدى

ليۆياداعى بوسقىنداردىڭ دا جاعدايى قيىن. ەلدە كۇن سۋىق، ميگرانتتار قىتىمىر قىستىڭ توسىن مىنەزىنە توزە الماي جاتىر. جىلۋ جوق. ايازدان سۋ قۇبىرلارى قاتىپ قالعان. ب ۇ ۇ- نىڭ بوسقىندار ءىسى جونىندەگى اگەنتتىگى كەلتىرگەن دەرەككە سايكەس، قازىرگى ۋاقىتتا 4 مىڭداي وتباسى كومەككە مۇقتاج ەكەن.

يسپانيادا 37 ميگرانت قۇتقارىلدى ال يسپانيا جاعالاۋىندا سولتۇستىك افريكادان شىققان 37 ميگرانت ءولىم اۋزىنان قۇتقارىلدى. بوسقىندار وتىرعان كەمە اتلانت مۇحيتىنداعى گران- كاناريا ارالىنان 24 شاقىرىم جەردە اپاتقا ۇشىراعان. قازىر ولار ارگينەگين پورتىندا. بارلىعى دارىگەرلەردىڭ تەكسەرۋىنەن وتكەن.

كانار ارالدارىنا وتكەن جىلى 22 مىڭنان استام ميگرانت كەلگەن. دەنى افريكالىقتار. ىشكى ىستەر مينيسترلىگىنىڭ مالىمەتىنە سايكەس، بۇل كەيىنگى ون جىلداعى ەڭ جوعارى كورسەتكىش. مەكسيكادا ۇستالعان ميگرانتتار سانى %78 ارتتى مەكسيكاعا قايتادان ميگرانتتار جاپپاي اعىلا باستادى. وعان كوروناۆيرۋستىق شەكتەۋ شارالارىنىڭ بىرتىندەپ جەڭىلدەي باستاۋى تۇرتكى بولدى.

تەك قاڭتاردا ەلدە 17 مىڭداي زاڭسىز بوسقىن ۇستالعان. بۇل بىلتىرعى كورسەتكىشپەن سالىستىرعاندا 78 پروتسەنتكە كوپ، دەيدى كوشى- قون جونىدەگى ۇلتتىق ينستيتۋت.

كەلىمسەكتەردىڭ كوبى وڭتۇستىك جانە ورتالىق امەريكا ەلدەرىنەن كەلگەن. ولارعا شەكارادا قىلمىستىق توپ كومەكتەسىپ جاتقان كورىنەدى. پوليتسيانىڭ كوزىنە ءتۇسىپ قالماس ءۇشىن بوسقىندار وتىرعان اۆتوبۋستارعا تانىمال كومپانيالاردىڭ لوگوتيپتەرى جابىستىرىلادى ەكەن.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى