الماتى وبلىسىندا «جەتىسۋ» راديوسى ىسكە قوسىلدى

الماتى وبلىستىق «جەتىسۋ» تەلەارناسىنىڭ جانىنان قۇرىلعان جاڭا راديو ۇجىم، تاۋلىك بويى ەلدەن جانە وڭىردەن اقپارات جەتكىزىپ، وبلىس تۇرعىندارىنىڭ اسەم- اۋەن، اۋەزدى كۇيمەن سۋسىنداپ، رۋحاني قۋاتتانۋىنا وزىندىك ۇلەس قوسپاق.

1997 -جىلعا دەيىن وبلىستا راديو بولعان. اراعا شيرەك عاسىر سالىپ، باعىتى مەن باعدارىن جاڭارتىپ، بىلىكتى جاس ماماندارمەن تولىقتىرىلعان راديو الدىمەن وبلىس ورتالىعى مەن شالعاي ەلدىمەكەندەرگە تاراتىلادى. جەكە دارا جيىلىك العانعا دەيىن ءبىر جىلداي ۋاقىت دايىندىق جۇمىستارى جۇرگىزىلىپ، قاجەتتى مۋزىكا قورى جيناقتالدى. جاڭا راديونىڭ ماتەريالدىق- تەحنيكالىق بازاسى نىعايتىلىپ، ءوز الدىنا جەكە عيمارات بەرۋ ماسەلەسى قاراستىرىلىپ جاتىر. ال بولاشاقتا ەلىمىزدىڭ وزگە دە ايماقتارىنىڭ تولقىندارىنا شىعۋ جوسپارلانعان.

«قىرعىزستان جاققا، قورداي جاققا بارساڭ قىرعىزدىڭ راديوسى، قىتاي شەكاراسىنا شىقساڭ قىتايدىڭ راديوسى سويلەپ تۇرادى. سوندىقتان ءبىز جاركەنت ايماعىن، الاكول، رايىمبەك اۋدانىن، ءبىرىنشى كەزەكتە سول جاقتى قامتۋعا تىرىسىپ جاتىرمىز. ازىرگە شاعان تاۋىنىڭ باسىندا ءبىر راديوتاراتقىش قۇرىلعىمىز قويىلدى. ول وسى تالدىقورعان ايماعىن قامتىپ تۇر»، - دەيدى «جەتىسۋ» راديوسىنىڭ جەتەكشىسى ەسبولات ايدابوسىن.

اۆتور: سامال قابىشيەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى