ءتول ويىنىمىز - توعىزقۇمالاقتان ۇزدىكتەر انىقتالدى
24-قاڭتاردا باستالعان وي- تاقتا ويىنى 1-اقپان كۇنى جەڭىمپازداردى انىقتادى. جارىسقا 11 وبلىس پەن 3 قالادان جالپى سانى 104 سپورتشى قاتىستى. ولاردىڭ اراسىندا قازاقستان رەسپۋبليكاسىنا ەڭبەك سىڭىرگەن سپورت شەبەرلەرى دە بار. 8 كۇن بويى جالعاسقان جەڭىسكە دەگەن ۇمتىلىس پەن قاجىرلى قايراتتىڭ ناتيجەسىندە ايەلدەر اراسىندا باس جۇلدەنى قاراعاندى وبلىسىنان كەلگەن ويىنشى اڭساعان قوجاناسىپ جەڭىپ السا، ەكىنشى ورىنعا تۇركىستان وبلىسىنان اسەل داليەۆا يە بولدى. ۇزدىك ۇشتىكتى اقتوبە وبلىسىنان كەلگەن گۇلجانات الدابەرگەنوۆا مەن تاعى ءبىر تۇركىستاندىق لينا كاريموۆا ءوزارا ءبولىستى.
ەرلەر اراسىندا شىمكەنت قالاسىنىڭ توعىزقۇمالاقشىسى عالىمجان تەمىربايەۆقا تەڭ كەلەر ەشكىم بولعان جوق. ەكىنشى ورىنعا قىزىلوردا وبلىسىنىڭ ويىنشىسى بەكسۇلتان بوستاندىقوۆ يە بولسا، ءۇشىنشى ورىندى اقتوبەلىك نۇربەك قابيەۆ قاناعات تۇتتى. ماراپاتتاۋ راسىمىندە ق ر ۇلتتىق قۇراما كومانداسىنىڭ اعا باپكەرى اينۇر جاقاپبايەۆا قۇتتىقتاۋ ءسوز سويلەپ، ەلىمىزدە توعىزقۇمالاق ۇلتتىق ويىنىن دامىتۋعا قوسقان ۇلەسى ءۇشىن سپورت ارداگەرى كيم يۋري فەدوروۆيچكە قازاقستان رەسپۋبليكاسى توعىزقۇمالاق سپورتى فەدەراتسياسىنىڭ «توعىزقۇمالاق قايراتكەرى» توسبەلگىسىن تابىستادى.
سونىمەن بىرگە، وبلىستىق دەنە شىنىقتىرۋ جانە سپورت باسقارماسىنىڭ باسشىسى اسىلجان جامانقۇل، ۇلتتىق قۇراما كومانداسىنىڭ اعا باپكەرى اينۇر جاقاپبايەۆا جانە سپورت ارداگەرى كيم يۋري فەدوروۆيچ جەڭىمپازدار مەن جۇلدەگەرلەردى ماراپاتتادى.
