زەلەنسكي رەسەيدەن شەكاراداعى اسكەرىن الىپ كەتۋدى سۇرادى

ۋكراينا پرەزيدەنتى ۆلاديمير زەلەنسكي ۇلى بريتانيا پرەمەر- ءمينيسترى بوريس دجونسونمەن كييەۆتە كەزدەسۋ كەزىندە وسىلاي دەپ مالىمدەدى.

ونىڭ ايتۋىنشا، قازىر رەسەي شەكارا جانىندا 100 مىڭعا جۋىق ساربازىن شوعىرلاندىرۋمەن قاتار قىرىمدا 50، ال دونباستا 35 مىڭعا دەيىن جاۋىنگەرىن ۇستاپ وتىر. ال ۇلى بريتانيا ۇكىمەت باسشىسى ۋكرايانعا شابۋىل رەسەي ءۇشىن ساياسي، گۋمانيتارلىق جانە اسكەري اپاتقا اينالادى دەپ اتاپ ءوتتى.

ايتا كەتەيىك، جاقىندا ۋكراينا، ۇلى بريتانيا جانە پولشا جاڭا ساياسي وداق قۇرعان بولاتىن.

ۆلاديمير زەلەنسكي ، ۋكراينا پرەزيدەنتى:

- ءبىز رەسەيدىڭ اسكەرىن شەكارا ماڭىنان الىپ كەتكەنىن قالايمىز. بۇل رەسەي فەدەراتسياسىنىڭ شيەلەنىستى جالعاستىرا بەرۋگە نيەتى بار- جوعىن انىق كورسەتەتىن ناقتى جاۋاپ بولماق. ەندى بوس ءسوزدىڭ قاجەتى جوق. تەك وسىنداي ناقتى قادام جاسالۋى كەرەك.

ال رەسەي پرەزيدەنتى ۆلاديمير پۋتين ناتو- نىڭ شىعىسقا قاراي كەڭەيۋىن سىنعا الدى. ونىڭ ايتۋىنشا، اليانس ءوز قاۋىپسىزدىگىن وزگە ەلدەردىڭ ەسەبىنەن قامتاماسىز ەتىپ وتىر. ال ۋكراينانىڭ اليانسكقا كىرۋى بۇل ەلدىڭ قىرىمدى باقىلاۋعا الۋعا تالپىنىسىنا اكەلىپ، قاقتىعىس ورىن الۋى مۇمكىن دەيدى.

ۆلاديمير پۋتين، رەسەي پرەزيدەنتى:

- وزدەرىڭىز بىلەسىزدەر، ناتو ينفراقۇرىلىمىن شىعىسقا قاراي ءبىر ەلى ۇلعايتپاۋعا ۋادە بەرگەن. ال قازىر ناتو پولشا، رۋمىنيا، بالتىق ەلدەرىنە دەيىن جەتتى. ولاردىڭ ايتۋى باسقا، ءىسى باسقا. ءبىزدى الداپ كەتتى. ال ەندى ۋكراينانى پولشا مەن رۋمىنيا سياقتى قارۋلانعان ناتو- نىڭ مۇشەسى بولىپ، اسكەري قيمىلدارعا باردى دەلىك. ولاي بولا قالعان جاعدايدا ءبىز ناتو- مەن سوعىسۋىمىز كەرەك پە؟ بۇل ماسەلەنى ويلاعان بىرەۋ بار ما؟

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى