تۇركىستاندا جاساندى كول سالىنىپ جاتىر - فوتو
جاساندى كولدىڭ اۋماعى (56000 م3) قازىلىپ، تىرەۋىش قابىرعالى جاعالاۋى بەتون قۇيۋ جۇمىستارىنا دايىندالىپ جاتىر. بۇل كول تۇركىستانداعى تارتىمدى دەمالىس ورىندارىنىڭ ءبىرى بولادى دەگەن جوسپار بار. تۇركىستان قالاسىندا جاڭادان سالىنىپ جاتقان نىسانداردىڭ قۇرىلىسىن ارالاپ كورگەن وبلىس اكىمى ءومىرزاق شوكەيەۆ جۇمىستاردى مەرزىمىندە ءبىتىرۋ كەرەكتىگىن تاپسىردى.
بيىل تۇركىستان قالاسىندا بەكزات ساتتارحانوۆ اتىنداعى سپورت كەشەنى پايدالانۋعا بەرىلەدى. قازىرگى تاڭدا نىساننىڭ جەر جۇمىستارى مەن ىرگەتاسىن قالاۋ ءىسى تولىق اياقتالعان. جەرتولە قابىرعاسى مەن ءبىرىنشى قاباتتاعى تىرەك قابىرعاسى دا اياقتالۋعا جاقىن تۇر. نىسان باسىندا 30-دان استام جۇمىسشى بار.
بۇل سپورت كەشەنىندە ءا. نۇرماحانوۆ اتىنداعى وليمپيادا رەزەرۆىنىڭ مامانداندىرىلعان بالالار- جاسوسپىرىمدەر سپورت مەكتەبىنىڭ ۇجىمى ورنالاسادى. 320 ورىنعا ارنالعان قوسىمشا عيماراتى سپورتتى دامىتۋعا سەرپىن بەرمەك. تۇركىستان قالاسىنداعى حالىقارالىق تەننيس ورتالىعىنىڭ قۇرىلىسى دا قارقىندى. بۇل ورتالىق تا بيىل پايدالانۋعا بەرىلەدى.
اۆتور: اينۇر اقبايەۆا
