بەيجىڭدەگى قىسقى وليمپيادادا قازاقستان تۋىن العاش رەت ەكى سپورتشى الىپ شىعادى

وليمپيادا ويىندارىنىڭ باستالۋى جاقىنداعان سايىن وندا جارىسقا دايىندىق تا قىزا ءتۇستى. قازاقستاندىق اتلەتتەر دە بەيجىڭ، ياڭچين جانە جاڭجياكوۋ قالالارىنداعى وليمپيادالىق قالاشىقتارعا تولىعىمەن ورنالاسىپ، بەلگىلەنگەن كەستەگە ساي جارىسقا سوڭعى جاتتىعۋلارىن پىسىقتاپ جاتىر. بەيجىڭ ءتورت جىلدا ءبىر ورالاتىن الەمنىڭ باستى سپورت تويىن وزگەشە وتكىزۋگە بارىنشا كۇش سالۋدا. بۇگىن، قىتاي كۇنتىزبەسى بويىنشا 1-اقپان. بۇل داتا ول ەلدە جاڭا جىل مەرەكەسى سانالادى. وسىعان وراي، وليمپيادانى ۇيىمداستىرۋ كوميتەتى الەمنىڭ ءار تۇكپىرىنەن كەلگەن اتلەتتەر مەن باپكەرلەر قاۋىمىنا سىيلىقتار ۇلەستىرۋدى دە جوسپارلاپ قويعاندارىن جەتكىزدى.

قىتاي استاناسىنداعى «ۇلتتىق ستاديوندا» وتەتىن جاھاندىق جارىستىڭ رەسمي اشىلۋ سالتاناتىن دا بۇرىن- سوڭدى بولماعان ەرەكشە قويىلىمدارمەن ەل ەسىندە قالدىرماق نيەتتە. وسىدان ءبىر كۇن بۇرىن اۋقىمدى دايىندىق جۇمىستارى ءوتىپ، وتشاشۋلاردى سىناقتان وتكىزدى. بەلگىلى بولعانداي، اشىلۋ سالتاناتى ەكولوگيا مەن يننوۆاتسيا تاقىرىپتارىنا ارنالماق. ال شوۋ 100 مينۋتقا سوزىلادى. وعان باستى سەبەپ - كوۆيت ىندەتىنىڭ تارالۋىنا جول بەرمەۋ. بۇگىندە قىتاي استاناسىندا كوروناۆيرۋس جۇقتىرۋ دەرەكتەرى كۇرت كوبەيىپ كەتكەن. سول سەبەپتى جەرگىلىكتى بيلىك دەرەۋ شارا قابىلداپ، قالانىڭ كەي اۋداندارى لوكداۋنعا جابىلاتىنىن جاريا ەتتى. سونداي-اق، ۇيىمداستىرۋشى كوميتەت ۆيرۋس جۇقتىرعانداردىڭ اراسىندا وليمپياداعا قاتىسۋشىلار دا بار ەكەنىن ايتتى.

بۇگىنگە دەيىن 170-تەن استام كوۆيد جۇقتىرۋ دەرەگى انىقتالعان. ونىڭ 51 ى - سپورتشىلار. ءقازىر ولاردىڭ ءبارى كارانتينگە الىنعان. ەڭ باستىسى - ازىرگە قازاقستاندىق اتلەتتەر اراسىندا ونداي دەرەكتەر تىركەلگەن جوق.

ەستەرىڭىزگە سالا كەتەيىك، XXIV قىسقى وليمپيادا ويىندارىنا قازاقستان قۇراماسىنان بارلىعى 34 سپورتشى قاتىسادى، ولار 87 جولداما جەڭىپ الدى. بۇگىندە ولار وليمپيادالىق قالاشىقتارعا ورنالاستى. قازاقستاندىقتار شاڭعى جارىسى، فريستايل، اكروباتيكا جانە موگۋل، كونكيمەن جۇگىرۋ، شورت- ترەك، بياتلون، تاۋ شاڭعىسى، تۇعىردان سەكىرۋ، شاڭعى قوسسايىسى سياقتى 8 سپورت تۇرىنەن سىنعا تۇسەدى.

ويىنداردى «Qazaqstan»، «Qazsport»، «حابار» جانە «Elarna « تەلەارنالارىنان تىكەلەي ەفيردەن كورۋگە بولادى. ءتورتجىلدىق دودانىڭ اشىلۋ سالتاناتى نۇر-سۇلتان ۋاقىتىمەن 4-اقپان كۇنى، ساعات 17:55-تە باستالادى. وليمپيادانىڭ سالتاناتتى اشىلۋ راسىمىندە ەلىمىزدىڭ بايراعىن ەكى سپورتشى الىپ شىعادى. بۇل - قىسقى سپورت تۇرلەرىنەن وليمپيادادا ەل بايراعىن العاش رەت ەكى سپورتشىمىزدىڭ كوتەرۋى. ونىڭ ءبىرى - شورت-ترەكتەن قازاقستان قۇراماسىنىڭ كوشباسشىسى ابزال اجىعاليەۆ بولسا، ەكىنشىسى - كونكيشى ەكاتەرينا ايدوۆا. ەكى سپورتشىمىز دا قۇراماداعى تاجىريبەلى، جۇلدەگە تالاسۋعا مۇمكىندىگى جوعارى سپورتشىلار.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى