بەدەۋلىك، سۋىقتاۋ جانە ءناپسىنى تەجەۋ - ۋرولوگپەن سۇقبات

اسىرەسە، ەر ازاماتتىڭ ۇرپاق قالدىرۋ قابىلەتىنىڭ ناشارلاۋى مەن باسقا دا جىنىس مۇشە اۋرۋلارىنىڭ، ينفەكسيالاردىڭ پايدا بولۋى كوپتى تولعاندىرعان ماسەلەگە اينالدى.

Massaget.kz ءتىلشىسى ەر ازاماتتىڭ دەنساۋلىعىنا قاتىستى ءجيى قويىلاتىن ساۋالداردى جيناپ، ا. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ مامانى، ۋرولوگ ءارى نەفرولوگ دارىگەر جاننۇر سىرىموۆتان سۇراپ كوردى. نازارلارىڭىزعا ۋرولوگپەن سۇقباتتى ۇسىنامىز.

- ەڭ الدىمەن، ۋرولوگ دەگەن كىم؟ كوبىمىز تار ماعىنادا تۇسىنەتىنىمىز راس. جاننۇر ماۋلەن ۇلى، سۇحباتىمىزدى سودان باستاساق...

- ۋرولوگ ەر ادامدى عانا ەمدەيدى دەگەن تۇسىنىك بار. ولاي ەمەس. ۋرولوگ - بۇيرەك پەن قۋىق، بۇكىل ءزار شىعارۋ (نەسەپ) جۇيەسىن ەمدەيتىن دارىگەر. دەمەك، وعان ايەل ادام دا جاتادى. ۋرولوگيانىڭ ءوزى ءوز ىشىنەن بىرنەشە سالاعا ءبولىنىپ كەتەدى. ماماندار سوعان وراي ماماندانادى. ماسەلەن، بۇيرەك اۋرۋلارى ءبىر بولەك، قۋىق اۋرۋلارى - ءبىر بولەك. بۇيرەك اۋرۋلارىنىڭ ءوزى بۇيرەك- تاس، سوزىلمالى بۇيرەك اۋرۋلارى، بۇيرەكتىڭ قابىنۋى بولىپ بولىنەدى. ودان بولەك، قانت ديابەتىنەن تۋعان بۇيرەك اۋرۋلارى بار. قۋىق اۋرۋلارى تۋا ءبىتتى، جۇرە پايدا بولاتىن، قابىنعان تۇرلەرى بولادى. قاتەرلى ىسىكتى تەكسەرىپ، ەمدەيتىن ونكوۋرولوگتارىمىز تاعى بار.

بالا ۋرولوگى، ەرەسەكتەر ۋرولوگى دەپ تە بولىنەدى. ال ەر ادامنىڭ بەلسىزدىگىن ەمدەۋمەن اينالىساتىن سالانى - اندرولوگيا دەيدى. جوعارىدا ايتىلعانداي، ايتىلعان سالانىڭ ءوز مامانى، ءوز دارىگەرى بار.

- تۇسىنىكتى. قازىر ەر ازاماتتار اراسىندا قانداي اۋرۋلار بەلەڭ الىپ بارادى؟

- ءبىزدىڭ ورتالىققا امبۋلاتورلىق ەسەپپەن كەلەتىندەرگە قاراساق، پروستاتيت (قۋىق ءتۇبى بەزىنىڭ قابىنۋى)، بەلسىزدىك بويىنشا جۇگىنەتىندەر كوپ. قازىر پروستاتيت پەن بەلسىزدىكتىڭ «جاسارىپ بارا جاتقانى» بايقالادى. جاستار جاعىنان كەلۋشىلەر كوبەيدى.

- پروستاتانىڭ العاشقى بەلگىلەرى قانداي، ايتا وتىرىڭىزشى...

- ەڭ العاشقى بەلگىسى - كىشى دارەتتى جىبەرە الماۋ. دارەت اششى، ىڭعايسىز شىعادى. تولىق شىقپاۋى مۇمكىن. قۋىق تۇسىندا، شاپتىڭ ورتاسىندا اۋىرسىنۋ بەلگىلەرى بولادى.

- پروستاتيتكە شالدىعۋعا نە سەبەپ؟

- بۇل اۋرۋدىڭ ەكى ءتۇرى بار. ءبىرى - باكتەريالدى، ەكىنشىسى - اباكتەريالدى. ءبىرىنشىسى سالقىن تيۋدەن، قيمىل-قوزعالىستىڭ جوقتىعىنان، كۇيزەلىس پەن اۋتويممۋندى اۋرۋدان پايدا بولادى. ال ەكىنشىسىن ينفەكتسيا جۇقتىرۋدان بولادى. ينفەكتسيانى جىنىستىق قاتىناسقا تۇسۋدەن (مۇشەقاپسىز) جۇقتىرۋى مۇمكىن.

- پروستاتيتتەن قالاي ەمدەلەدى؟

- دۇرىس دياگنوستيكا جۇرگىزىلىپ، سەبەبى ناقتى انىقتالۋى ءتيىس. كەيىن سوعان ساي ەمدەۋ شاراسى جاسالادى. سول ەمدى تولىق قابىلداسا جانە پروفيلاكتيكاسىن ۇستانسا، پروستاتيتتەن تولىق جازىلۋعا بولادى. ونى ەمدەۋ ءۇشىن سابىر مەن ءتوزىم كەرەك.

- بەدەۋلىك قانشالىقتى ەمدەلەدى؟

- كەيدە ورتالىققا ۇيلەنگەنىنە 2-3 اي بولعان جاستار «بالا بولمادى»، «جۇكتى بولا المادىق» دەپ كەلىپ جاتادى. بۇل - بەدەۋلىكتىڭ كورسەتكىشى ەمەس. ەگەر ەرلى-زايىپتى 2 جىل بويى بالا سۇيە الماسا، مۇندا بەدەۋلىكتىڭ بەلگىلەرى بار. سوندىقتان ەڭ الدىمەن جۇكتىلىكتى كۇتۋ قاجەت.

بەدەۋلىكتىڭ ەمدەلۋ-ەمدەلمەۋى جالپى جاعدايعا بايلانىستى. ەگەر ەر ازاماتتىڭ ۇرىعىندا «ءتىرى» سپەرماتوزويد قالماسا (سپەرموگرامما تاپسىرۋ)، وندا جاعداي قيىن. وكىنىشكە قاراي، مۇنداي ەر ادام بالا سۇيە المايدى. ەگەر ۇرىعىندا از دا بولسا، قوزعالمالى ءتىرى سپەرماتوزويدتار بولسا، وندا ۇرپاق قالدىرۋعا مۇمكىندىگى بار. مۇندايدا ءبىز فيزيوتەراپيا قولدانىپ، ءدارى-دارمەك بەرىپ، ۆاريكوتسەلە سىندى اۋرۋعا وتا جاساپ، ەم-شارا جاسايمىز. ءبىراز ۋاقىت ەم قابىلداعاننان كەيىن ءتىرى ۇرىقتىڭ سانى كوبەيسە، ەم قوندى دەگەن ءسوز. ەگەر ودان دا ناتيجە شىقپاسا، وندا ەكوعا، ياعني، قولدان ۇرىقتاندىرۋعا جىبەرەمىز.

- بەدەۋلىككە نە سەبەپ؟

- سەبەبى كوپ. عىلىمدا اشىلماعان سىرلارى بار ءالى. ءبىزدىڭ ويىمىزشا، ءبىرىنشى كەزەكتە ەكولوگيانىڭ ناشارلىعى مەن قۇنارلى تاعام ءىشىم-جەمەۋ تۇر. كونسەرۆانت تاعامداردى كوپ جەيمىز. بۇل دۇرىس ەمەس. كەيىنگى كەزدە سوزىلمالى اۋرۋلار دا كوبەيدى. ءتۇرلى ينفەكسيالار پايدا بولۋدا. سالعىرتتىقپەن قاۋىپتى ينفەكتسيالاردى جۇقتىرىپ العانىمىزدى ءوزىمىز دە سەزبەي قالامىز. ول ءۇشىن تۇراقتى تەكسەرىلىپ تۇرۋ كەرەك.

ەر ازاماتتىڭ جۇمىس ورنىنا دا بايلانىستى. رادياتسيالىق، حيميالىق كاسىپورىندا ىستەيتىندەر قاۋىپتى ايماقتا ءجۇر. سوعان دا قاراۋ كەرەك.

- ولار قانداي ينفەكسيالار؟

- بەلسىزدىككە سەبەپكەر بىردەن-ءبىر ينفەكسيا - حلاميدا نەمەسە حلاميديوز. جىنىس مۇشەسى ارقىلى جۇعادى. مۇنى جۇقتىرعان ادام جۇقتىرعانىن بىلمەي جۇرە بەرەدى. بەلگىلەرى بايقالا قويمايدى. ودان بولەك گونورەيا، ستريكتۋرا سىندى ينفەكسيالار بار. كىشى دارەتكە «شابۋىل جاسايتىن» ينفەكسيالار.

- سۋىقتاۋ، مۇزداۋ، اياقتان سۋىق ءوتۋ، سۋىق تيۋ قانشالىق قاۋىپتى؟

- نەگىزىنەن ەر ادامنىڭ جىنىس مۇشە اۋرۋلارىنا باستى سەبەپ - ءدال وسى سۋىقتاۋ، سۋىق ءوتۋ. ول دا ينفەكسيا تۋعىزادى. سۋىق ءوتۋ سوزىلمالى پروستاتيت پەن بەدەۋلىككە الىپ كەلەدى.

- ءناپسىنى تەجەۋ (ۆوزدەرجانيە) قانشالىقتى دۇرىس؟

- توقىراۋ پروستاتيتى دەگەن بار. ۇرىق قۋىقاستى بەزىنە جيناقتالىپ، قۋىققا كەرى اسەر ەتەدى. اۋرۋ سودان پايدا بولادى. ال بۇعان سەبەپ - جىنىستىق قاتىناسقا تۇسپەۋ. ۇزاق ۋاقىت، ايلاپ تۇسپەۋ.

- اپتاسىنا قانشا رەت جىنىستىق قاتىناسقا تۇسكەن دۇرىس؟

- كەم دەگەندە، ەكى رەت. سونى ءبىز بەلسەندى جىنىستىق قاتىناس دەپ ەسەپتەيمىز. جىنىستىق قاتىناسقا از تۇسكەن سايىن، ونىڭ فۋنكسياسى دا ناشارلاي بەرەدى. جىنىستىق قاتىناس ادامنىڭ قان اينالىمىن جاقسارتادى. قۋىققا قان ءجۇرىپ، كوپ اۋرۋدىڭ الدىن الۋعا بولادى.

- قانداي بەلگىلەر بايقالعاندا بىردەن ۋرولوگقا قارالۋ كەرەك؟

- جاستار ۇيلەنگەنگە دەيىن ءبىر قارالىپ السىن دەپ كەڭەس بەرەر ەدىم. دەنى ساۋ ۇرپاق اكەلۋ ءۇشىن ىشتەگى اۋرۋ مەن ينفەكسيالاردان ەمدەلىپ الۋ كەرەك. سوسىن بۇيرەك اۋىرسىنسا، كىشى دارەت شىقپاسا نەمەسە اششى، قىزىل بولىپ شىقسا، وندا بىردەن ۋرولوگقا جۇگىنىڭىز.

- ەر ادامدارعا دەنساۋلىعىن ساقتاۋ ءۇشىن نەندەي كەڭەس بەرەر ەدىڭىز؟

- ەڭ الدىمەن، دۇرىس تاماقتانۋ قاجەت. ياعني، الكوگولدى ىشىمدىك پەن اششى تاعامداردان باس تارتقان ءجون. الكوگول قۋىق ءتۇبى بەزىنىڭ قابىنۋىنا اكەلەدى. ماسەلەن، بىزدە ەمدەلىپ ءجۇرىپ ىشىمدىكتى قويعان ادامداردىڭ كەيىن ءىشۋدى قايتا باستاپ كەتكەندە، اۋرۋىنىڭ اسقىنىپ كەتكەنىن تالاي كوردىك. سوندىقتان بارىنشا ىشىمدىكتەن باس تارتىڭىز. قۇنارلى، تابيعي تاعام جەۋگە تىرىسقان ءجون. ءتاتتى، قانتى مول تاعامداردى ازايتقان جاقسى.

جيى سپورتپەن اينالىسىڭىز. جۇگىرۋ، ءجۇرۋ، اتقا ءمىنۋ - وسىنىڭ ءبارى سپورت. سپورتپەن اينالىسقان ادامنىڭ قان اينالىمى جاقسارادى. سەمىزدىك تەستوستەروندى ازايتادى. ال سپورت بۇل گورموندى كوبەيتەدى.

ءۇشىنشى كەڭەسىم - ءجيى جىنىستىق قاتىناسقا ءتۇسۋ. وعان نەمقۇرايلى، بەي-جاي قاراماۋ. ماسەلە جيىلىكتە ەمەس، ۇنەمى، ءاردايىم، ساپالى جاساۋدا.

- سۇحباتىڭىزعا راقمەت!

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى