پرەزيدەنتتىڭ تىڭ باستامالارى ەكونوميكانىڭ جاڭاشا دامۋىنا ىقپال ەتەدى - مەيرام بەگەنتايەۆ
Satbayev University باسقارما ءتوراعاسى - رەكتور مەيرام بەگەنتايەۆ وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ سۇحباتىنان («حابار» تەلەارناسىنا بەرگەن ەكسكليۋزيۆتى سۇحباتى) تۇيگەن نەگىزگى ويىم - ءبىز ءوز ىسىمىزدە ەڭ الدىمەن مەملەكەت مۇددەسىن باسشىلىققا الۋىمىز كەرەك. ءبىز ءارقايسىمىز ءوز ورنىمىزدا ءوز مىندەتتەرىمىزدى اتقارا وتىرىپ، ەڭ باستى ماقساتىمىزعا - ويعا العان ءىسىمىز ەلگە، بارشا قازاقستاندىقتاردىڭ يگىلىگىنە قانشالىقتى پايدالى بولاتىنىنا سۇيەنىپ، ءىسىمىزدى سول مىندەتپەن سالىستىرۋىمىز كەرەك.
قاڭتار وقيعاسى كەزىندە ونىڭ ءبىرقاتار شەشىمدەرىن باتىس ەلدەرىنىڭ ساياساتكەرلەرى قولدامايتىنىن مەملەكەت باسشىسى، ارينە، ءبىلدى. الايدا لاڭكەستەرگە تويتارىس بەرىپ، ۇلتتىق مۇددەلەردى قورعاۋ قاجەت بولعان جاعدايدا ول بارلىق جاۋاپكەرشىلىكتى ءوز موينىنا الدى - بۇل حالىقتىڭ قاۋىپسىزدىگىن، بەيبىت تۇرعىنداردىڭ تىنىشتىعىن قامتاماسىز ەتتى»، - دەدى مەيرام بەگەنتايەۆ.
سونىمەن قاتار ۋنيۆەرسيتەت رەكتورى پرەزيدەنت ەلىمىزگە ساياسي رەفورمالار قاجەتتىگىن مالىمدەگەنىن ەسكە سالدى.
«ەلدەگى ءارتۇرلى ساياسي كۇشتەردىڭ ەركىن باسەكەلەستىگىنە قولايلى جاعداي جاسالعاندا عانا ەكونوميكا جاڭاشا دامىپ، جاڭا جاعدايلارعا بەيىمدەلەدى دەگەنگە كەلىسەمىن. ساياسي باسەكەلەستىك ەكونوميكانىڭ بارلىق قازاقستاندىقتاردىڭ يگىلىگى ءۇشىن تيىمدىرەك جۇمىس ىستەۋىن قامتاماسىز ەتەدى. دەگەنمەن ەلدىڭ بولاشاق دامۋى تۋرالى وتكىر قاراما-قايشى پىكىرلەردىڭ قوعامدا ۇستەمدىك قۇرۋىنان اۋلاق بولۋىمىز كەرەك»، - دەدى م. بەگەنتايەۆ.
ونىڭ پايىمىنشا، ەڭ باستىسى، مەملەكەت باسشىسى مەن ونىڭ اكىمشىلىگى قاستاندىق جاساۋشىلاردىڭ باستاماسىنا از عانا ۋاقىت ىشىندە توسقاۋىل قويىپ، جاعدايدى ءوز باقىلاۋىنا الا ءبىلدى.
