قارىزعا باتقان قازاقستان
نەسيەدەن قۇتىلۋ ءۇشىن نەسيە الۋدىڭ سوڭى تريلليونداعان قارىزعا اكەپ تىرەگەن سىڭايلى.
2022 -جىلدىڭ 1-قاڭتارىنداعى جاعداي بويىنشا قازاقستاننىڭ بولشەك نەسيە پورتفەلى 10,76 تريلليون تەڭگەنى قۇراعان. بۇل بىلتىرمەن سالىستىرعاندا 42,9 پايىزعا جوعارى. ءبىرىنشى نەسيە بيۋروسى وسىنداي اقپارات تاراتتى.
بولشەك قارىز پورتفەلىنىڭ باسىم بولىگىن كەپىلسىز نەسيەلەر (5,28 تريلليون تەڭگە) قۇراسا، يپوتەكالىق نەسيە ۇلەسى - 3,39 تريلليون تەڭگە، اۆتونەسيەلەۋ - 1,09 تريلليون تەڭگە، نەسيە كارتالارى - 348,3 ميلليارد تەڭگە جانە كەپىلدى تۇتىنۋشىلىق نەسيەلەر 498,3 ميلليارد تەڭگە ەكەن. بۇل رەتتە ءبىرىنشى نەسيە بيۋروسى تەك ەكىنشى دەڭگەيلى بانكتەردىڭ عانا ەمەس، ودان باسقا دا قارجى ۇيىمدارىنىڭ كورسەتكىشىن ەسەپكە العان. ايتا كەتكەن ابزال، بولشەك نەسيەنىڭ 90,3 پايىزىن ەكىنشى دەڭگەيلى بانكتەر ۇسىنعان.
2021 -جىلى جالپى 8,9 تريلليون تەڭگە بولشەك نەسيە بەرىلگەن. 2020 -جىلمەن سالىستىرعاندا 83,6 پايىزعا نەمەسە 4,1 تريلليون تەڭگەگە كوپ. 25,67 ملن كەلىسىمشارت جاسالسا، قارىز الۋشىلار سانى 6,16 ميلليون ادامعا جەتكەن. وسى رەتتە زەينەتاقى قورىنداعى ارتىق اقشانى پايدالانۋ مۇمكىندىگى نەسيە كولەمىنىڭ كوبەيۋىنە مۋلتيپليكاتيۆتى اسەر بەرگەن. بۇل يپوتەكالىق نەسيەنىڭ وسۋىنە دە (1,92 تريلليون تەڭگەگە جەتكەن) ىقپال ەتكەن.
ال بيۋرو بىلتىر بەرگەن كەپىلسىز نەسيە كولەمى 5,45 تريلليون تەڭگە دەگەن دەرەك كەلتىرەدى. 2020 -جىلعا قاراعاندا كەپىلسىز نەسيە 86,1 پايىزعا، نەسيە كارتالارى 95,2 پايىزعا (401,5 ميلليارد تەڭگە) وسكەن. اۆتوكولىك الۋ ماقساتىنداعى قارىزدارعا 592,2 ميلليارد تەڭگە بولىنگەن. وڭىرلەر بولىنىسىندە زايمداردىڭ كوبى الماتى، نۇر- سۇلتان قالالارىنا جانە الماتى مەن تۇركىستان وبلىستارىنا تيەسىلى. ەلدەگى بۇكىل قارىزدىڭ 44 پايىزى وسى ءتورت ايماقتىڭ ەنشىسىندە ەكەن.
2021 -جىلى ب ج ز ق- دان تۇرعىن ءۇي جاعدايىن جاقسارتۋ ماقساتىندا 2,5 تريلليون تەڭگە الىنعان. ءۇي ساتىپ الۋعا - وسى قاراجاتتىڭ 68,5 پايىزى، يپوتەكانى وتەۋگە - 15,3 پايىزى، باسقا ماقساتتارعا 16,2 پايىزى جۇمسالعان. ۇلتتىق ستاتيستيكا بيۋروسىنىڭ دەرەگىنشە، تۇرعىن ۇيمەن جاسالعان كەلىسىم سانى 606 مىڭنان اسقان. بۇل رەتتە اۆتوترانسپورتتى تىركەۋ بويىنشا كەلىسىمدەر ءبىرشاما تومەندەگەن.
«2021 -جىلدىڭ 11-ايىندا اۆتوترانسپورتتى تىركەۋ سانى الدىڭعى جىلمەن سالىستىرعاندا 1,3 پايىزعا تومەندەپ، 710,4 مىڭ بىرلىكتى قۇرادى. مۇنداي تومەندەۋ ەكىنشى نارىق ەسەبىنەن بولىپ وتىر. ال جاڭا اۆتوموبيلدەردىڭ ساتىلىمى 25,9 پايىزعا ءوسىپ، 117 مىڭ بىرلىككە جەتتى. سونىمەن قاتار اۆتوكولىك الۋ ماقساتىمەن راسىمدەلگەن نەسيەنىڭ جالپى سوماسى 57,5 پايىزعا ۇلعايىپ، 592,2 ميلليارد تەڭگەنى قۇرادى»، دەپ مالىمدەدى ءبىرىنشى نەسيە بيۋروسى.
2022 -جىلدىڭ 1-قاڭتارىنداعى جاعداي بويىنشا بىلتىر نەسيە جۇيەسى 333 مىڭ قارىز الۋشىمەن تولىققان. وسىنشاما ادام 2021 -جىلى العاش رەت نەسيەگە جۇگىنگەن جانە بۇرىن- سوڭدى نەسيە تاريحى بولماعان. ولار جالپى سوماسى 118,5 ميلليارد تەڭگە كولەمىندە العاشقى نەسيە راسىمدەگەن.
اباي قازبەك ۇلى
egemen.kz
