بەردىبەك ساپاربايەۆ كوپ وقاباتتى ۇيلەر ىرگەسىندەگى دۇكەندەرگە توسىننان كىرىپ، باعانى تەكسەردى
«جايلاۋ» جانە «اقبۇلاق» مولتەك اۋداندارىندا ورنالاسقان شاعىن دۇكەندەرگە باس سۇققان ايماق باسشىسى نان، ءسۇت، كۇرىش، قاراقۇمىق، ءسابىز، كارتوپ، پياز جانە تاعى باسقا تاۋارلاردىڭ قانشادان جەتكىزىلەتىنىن، تۇتىنۋشىلارعا قانشادان ساتىلاتىنىن سۇرادى. جالپى، ساۋدا قىزمەتىن رەتتەۋ تۋرالى زاڭ الەۋمەتتىك ماڭىزى بار ازىق- تۇلىك تاۋارلارىنا شەكتى ساۋدا ۇستەمە باعاسىن بەلگىلەۋدى كوزدەيدى. ول 15 پايىزدان اسپاۋعا ءتيىس. اتالعان دۇكەندەردەگى ءبىرقاتار تاۋارلار بويىنشا جوعارىداعى زاڭ تالاپتارى ساقتالماي وتىرعانى انىقتالدى. قوسىلعان ۇستەمە اقى 25-30 پايىزعا دەيىن جەتەدى.
وبلىس اكىمى باعا رەتتەۋدە ءۇي ىرگەسىندە دۇكەندەردىڭ ماڭىزى زور ەكەنىن، ولار بويىنشا تەرەڭ، ناقتى تالداۋلار جۇرگىزۋ كەرەكتىگىن باسا ايتتى.
«مەملەكەت باسشىسىنىڭ تاپسىرماسىنا سايكەس ازىق- تۇلىك تاۋارلارىنىڭ باعاسىن رەتتەۋ، تۇراقتاندىرۋ -ءبىزدىڭ باستى مىندەتىمىز. قالا حالقىنىڭ باسىم بولىگى كوپقاباتتى تۇرعىن ۇيلەردە تۇرادى. ولار كۇندەلىكتى قاجەتتىلىكتەرىن ءۇي ىرگەسىندەگى وسىنداي شاعىن دۇكەندەردەن ساتىپ الادى. باعاعا دەگەن كوزقاراسى وسىنداي ساۋدا نۇكتەلەرىنە بايلانىستى قالىپتاسادى. بىزگە ءىرى ساۋدا ورىندارىنان بولەك، وسىنداي شاعىن دۇكەندەردى ءجىتى نازارعا الىپ، ءجيى تەكسەرۋ جۇرگىزىپ وتىرۋ اسا قاجەت. اسىرەسە، جەتكىزۋشىلەرمەن جۇمىس جۇرگىزۋ كەرەك. ولار دۇكەندەرگە الەۋمەتتىك ماڭىزى بار ازىق- تۇلىكتەردى قانداي باعادا جەتكىزىپ وتىرعانىن زەردەلەۋ قاجەت، ناقتى بۇزۋشىلىقتار بويىنشا شارالار قابىلداۋعا ءتيىسپىز»، - دەدى ب. ساپاربايەۆ.
ايماق باسشىسى كاسىپكەرلىك جانە يندۋستريالدى- يننوۆاتسيالىق دامىتۋ باسقارماسىنىڭ باسشىسى اسپانديار سەيسەبايەۆ پەن تاراز قالاسىنىڭ اكىمى ەرجان جىلقىبايەۆقا ءتيىستى مىندەتتەر جۇكتەپ، جۇيەلى جۇمىستار جۇرگىزۋدى تاپسىردى.
ايتا كەتۋ كەرەك، جامبىل وبلىسىنىڭ تۇرعىندارى باعانىڭ نەگىزسىز ءوسۋى، دۇكەندەردە فيسكالدى چەكتەردىڭ بەرىلمەۋى، ءونىم ساپاسى، ۆيترينا مەن كاسساداعى باعانىڭ ايىرماشىلىعى، كوتەرمەن ساۋدا ۇيىمدارى مەن ءىرى جەلىلەردىڭ باعا كەلىسىمى بويىنشا شاعىمدارىن ارنايى سەنىم تەلەفونى (87262542138) ارقىلى جەتكىزە الادى.
