ءى ءى م زاڭسىز ساقتالعان اتىس قارۋى مەن وق- دارىلەردى ءوز ەركىمەن تاپسىرۋ تۋرالى ۇندەۋ جاريالادى
ەلدەگى جاپپاي تارتىپسىزدىكتەر بارىسىندا قارۋ- جاراق دۇكەندەرىنەن، قۇقىق قورعاۋ جانە ارنايى ورگانداردىڭ عيماراتتارىنان قىلمىسكەرلەر اتىس قارۋى مەن وق- دارىلەردى ۇرلادى. ۇرلانعان قارۋ مەن وق- دارىلەر زاڭسىز ماقساتتار ءۇشىن پايدالانۋى مۇمكىن، سونداي- اق ازاماتتاردىڭ ءومىرى مەن دەنساۋلىعىنا قاۋىپ توندىرەدى. قارۋ مەن وق- دارىلەردى زاڭسىز ساقتاعانى ءۇشىن قىلمىستىق (ق ك 287-بابى - 5 جىلعا دەيىن باس بوستاندىعىنان ايىرۋ) جانە اكىمشىلىك (ق ر ا ق ب ت ك 482-بابى-25 ا ە ك ايىپپۇل) جاۋاپكەرشىلىك كوزدەلگەنىن قاپەرلەرىڭىزگە سالامىز.
زاڭسىز ساقتالعان قارۋدى، وق- دارىلەردى جانە جارىلعىش زاتتاردى ءوز ەركىمەن تاپسىرعان ادامدار، ەگەر ولاردىڭ ءىس- ارەكەتتەرىندە وزگە قىلمىستار قۇرامى بولماسا، قىلمىستىق جانە اكىمشىلىك جاۋاپكەرشىلىكتەن بوساتىلادى. وسىعان بايلانىستى ءى ءى م ازاماتتاردى زاڭسىز ساقتالعان قارۋدى، وق- دارىلەردى، جارىلعىش زاتتاردى جانە ارنايى قۇرالداردى ءوز ەركىمەن تاپسىرۋعا شاقىرادى.
جازاتايىم وقيعالاردىڭ الدىن الۋ جانە جاراقاتتان ساقتاندىرۋ ماقساتىندا تابىلعان جارىلعىش ماتەريالدارمەن جانە وق- دارىلەرمەن قانداي دا ءبىر ارەكەتتەر جاساماۋدى، ولاردى تاسىمالداۋعا تىرىسپاۋدى، بۇل تۋرالى پوليتسياعا 102 نەمەسە 112 تەلەفوندارى بويىنشا حابارلاۋدى سۇرايمىز. ءى ءى م جۇرگىزىلىپ جاتقان وسىنداي شارالارعا حالىق تۇسىنىستىكپەن قاراپ، قولداۋ بىلدىرەدى دەپ سەنەدى.
