ەلوردانىڭ بلوكبەكەتتەرىندە قانداي زاتتار تاركىلەنىپ جاتىر

توتەنشە جاعداي رەجيمى كەزىندە قالاعا كىرىپ- شىققان ءار ادام مەن كولىك ءجىتى تەكسەرىلىپ جاتىر. وسىعان وراي تەكسەرىس بارىسىندا جولاۋشىلاردان ءتۇرلى تىيىم سالىنعان زاتتار تابىلىپ جاتقانى انىقتالدى.

بۇل تۋرالى قالالىق پوليتسيا دەپارتامەنتىنىڭ باسپا ءسوز قىزمەتى مالىمدەپ وتىر، دەپ حابارلايدى قازاقپارات ءتىلشىسى.

«پوليتسەيلەر اسىرەسە بلوكبەكەتتەگى ءتارتىپتى ەرەكشە باقىلاۋدا ۇستاۋدا. بلوكبەكەتتەر قويىلعان ساتتەن باستاپ تىيىم سالىنعان زاتتاردى انىقتاۋ ماقساتىندا شامامەن 50 مىڭ اۆتوكولىك تەكسەرىلدى. ونىڭ بارىسىندا بلوكبەكەتتەردەن 2 تەگىس ۇڭعىلى «سايگا» مىلتىعى، «ر گ د-5» وقۋ- جاتتىعۋ گراناتاسى، «СVvz.27» ماركالى تاپانشا، وقتان قورعايتىن كۇرتەشە، وق- دارىلەر، 11 بەيسبول تاياعى، 5 رەزەڭكە تاياق، كاستەتتەر، دۋبينكالار، اەروزولدىك تاپانشا، قول كىسەنى جانە بۇرىشتى بالونشالار تاركىلەندى. بارلىق فاكتىلەر بويىنشا تەكسەرۋ جۇمىستارى جۇرگىزىلۋدە»، - دەلىنگەن حابارلامادا.

سونداي-اق، دەپارتامەنت مالىمەتىنشە، بلوكبەكەتتە ەسىرتكىنى زاڭسىز ساقتاۋدىڭ 2 فاكتىسى انىقتالعان.

«بلوكبەكەتتە اۆتوكولىك توقتاتىلىپ، تەكسەرۋ بارىسىندا ۇرلىق جاسادى دەگەن كۇدىكپەن 26 جاستاعى جولاۋشى انىقتالدى. بۇعان دەيىن ونىڭ وتكەن جىلدىڭ ماۋسىم ايىندا پاۆلودار قالاسىندا ۇرلىق جاساعانى بەلگىلى بولدى. سونداي-اق، وزگە اۆتوكولىكتىڭ 36 جاستاعى جولاۋشىسى قاراعاندى قالاسىندا وسىعان ۇقساس قىلمىس جاساعانى ءۇشىن ۇستالدى. بلوكبەكەتتە ۇستالعان كۇدىكتىلەر ىزدەۋ بولىمشەلەرىنە تاپسىرىلدى»، - دەپ حابارلاندى قالالىق پوليتسيادان.

نۇر-سۇلتان قالاسىنىڭ پوليتسيا دەپارتامەنتى تۇرعىنداردان توتەنشە جاعداي رەجيمىن ساقتاپ، كومەندانتتىق ساعات ەرەجەسىن بۇزباۋعا شاقىرادى.

سول سياقتى زاڭبۇزۋشىلىق ءۇشىن جاۋاپكەرشىلىكتىڭ بارىن ەسكە سالادى.

اۆتور: ءالي يبرايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى