اسا جۇقپالى «وميكرون» بالالاردا دا اۋىر ءوتىپ جاتىر - ينفەكسيونيست
دارىگەرلەر ءۇشىن ەرەسەكتەرگە دە، بالالارعا دا بىردەي اسەر ەتەتىن جاڭا «وميكرون» شتامىنىڭ پايدا بولۋى قيىندىق تۋدىرىپ وتىر. بالالار جۇقپالى اۋرۋلارى كافەدراسىنىڭ مەڭگەرۋشىسى، دارىگەر- ينفەكسيونيست ديناگۇل باەشەۆا ينفەكسيانىڭ قاۋپى جانە ونىڭ تارالۋىنىڭ الدىن الۋ جولدارى تۋرالى ايتتى، دەپ حابارلايدى قازاقپارات نۇر-سۇلتان اكىمدىگىنىڭ رەسمي سايتىنا سىلتەمە جاساپ. ديناگۇل باەشەۆانىڭ ايتۋىنشا، قازىر رەسپيراتورلىق ۆيرۋستى اۋرۋلار دەڭگەيىنىڭ كوتەرىلۋى كەزەڭىندە تۇماۋمەن قاتار كوروناۆيرۋس ينفەكسياسى ەرەكشە الاڭداۋشىلىق تۋدىرۋدا.
«بۇل پروبلەما ءالى دە وزەكتى بولىپ سانالادى، ويتكەنى ەلىمىزدە اسا جۇقپالى «وميكرون» شتامى پايدا بولدى. ونىڭ بەرىلۋ جىلدامدىعى «دەلتا» شتامىنان بىرنەشە ەسە جوعارى. كەز كەلگەن جاستاعى ادامعا، ونىڭ ىشىندە بالالارعا دا وڭاي ءتيىپ جاتقان جوق. شەتەلدىك دارىگەرلەردىڭ مالىمەتىنشە، «وميكرون» بالالاردا دا اۋىر ءوتىپ جاتىر، ونى ءبىز دە ءوز كوزىمىزبەن كورىپ وتىرمىز. كوروناۆيرۋستىڭ قانداي شتامى بولماسىن يممۋنوكومپرومەتيرلەنگەن ادامداردا، قوسىمشا اۋرۋى بار ناۋقاستاردا، سول سياقتى ونكولوگيالىق اۋرۋلارمەن، يممۋن تاپشىلىعى جاعدايلارىمەن جانە وزگە دە ىلەسپە اۋرۋلارمەن اۋىراتىن ناۋقاستاردا ەرەكشە اۋىر وتەدى»، - دەپ ءتۇسىندىردى دارىگەر.
ونىڭ ايتۋىنشا، اۋرۋدىڭ ەكسپونەنتسيالدى تۇردە ءوسىپ كەتپەۋى جانە كۇنىنە مىڭ نەمەسە ودان دا كوپ ادام اۋىرماۋى ماڭىزدى. ول ءۇشىن ازاماتتار ەپيدەمياعا قارسى ءىس-شارالاردى قاتاڭ ساقتاۋى ءتيىس: الەۋمەتتىك قاشىقتىق، ماسكا رەجيمى، قول جۋۋ، قولدى كوزدىڭ جانە مۇرىننىڭ شىرىشتى قاباتىنا تيگىزبەۋ، ادام كوپ جينالاتىن ورىندارعا بارماۋ.
«وكىنىشكە قاراي، ءبىز كىشكەنتاي بالاسى بار اتا-انالاردىڭ ساۋدا ورتالىقتارىندا الاڭسىز سەرۋەندەپ جۇرگەنىن ءجيى كورەمىز. قازىرگىدەي جاعدايدا مۇنداي ورىنداردا دەمالۋ ورىنسىز. ەگەر بالاڭىزدىڭ دەنساۋلىعىن ويلاساڭىز بارىنشا تۇسىنىستىكپەن قاراپ، وقشاۋلانعان ورىنداردا دەمالعانىڭىز ءجون. ءبىز ەلىمىزدەگى بارلىق ستاتسيونارلار بويىنشا تالداۋ جۇرگىزىپ، 2021 جانە 2020 -جىلدارى كوروناۆيرۋس ينفەكسياسىمەن اۋىرعانداردىڭ سانىن سالىستىردىق. ناتيجەسىندە 2021 -جىلى ك ۆ ي- مەن اۋىراتىندار سانى 5 ەسە، ال اۋىر ناۋقاستار سانى 20 ەسە وسكەنىن كوردىك»، - دەدى ينفەكسيونيست.
ول اتا-انالاردى بالالارىنىڭ رەسپيراتورلى اۋرۋ بەلگىلەرى بار تۋىستارىمەن، جاقىندارىمەن، تانىستارىمەن قارىم-قاتىناستا بولماۋ كەرەكتىگىن ايرىقشا اتاپ ءوتتى. سەبەبى كوروناۆيرۋستىڭ بەلگىلەرى ۇقساس: جۇتقىنشاقتىڭ اۋىرۋى، جوتەل جانە ت. ب. دارىگەر ۆاكسيناتسيانى COVID-19-دان قورعانۋدىڭ وڭتايلى جانە ءتيىمدى شاراسى دەپ اتادى.
«بۇكىل الەمدىك قاۋىمداستىق ۆاكسيناتسيانىڭ تيىمدىلىگىنە كوز جەتكىزدى. ەگەر بالامىزدى اۋىر اسقىنۋلاردان ساقتاعىمىز كەلسە مىندەتتى تۇردە ۆاكسيناتسيالاۋىمىز كەرەك. 2021 -جىلى ۆاكسيناتسيانى ۋاقىتىلى العانداردى قۇتقارۋ مۇمكىن بولدى، ال ۆاكسينانىڭ ءتولقۇجاتىن ساتىپ العانداردان ايىرىلىپ قالدىق. بالالار بۇل اۋرۋدى وڭاي وتكەرسە دە ۆيرۋستىڭ كەيىنگى سالدارى قانداي بولارىن بىلمەيمىز. كوروناۆيرۋسقا قارسى ۆاكسيناتسيا بۇگىنگى تاڭدا ەڭ ءتيىمدى الدىن الۋ شارالارىنىڭ ءبىرى بولىپ سانالادى»، - دەپ قورىتىندىلادى ديناگۇل باەشەۆا.
