ەربولات دوسايەۆ اقشانى سىرتقا جىلىستاتۋمەن قالاي كۇرەسەتىنىن باياندادى
«ءۇشىنشى باعىت كاپيتالدى نەگىزسىز شىعارۋعا قارسى ءىس- قيمىل بولىپ تابىلادى. مەملەكەت باسشىسى توتەنشە جاعداي رەجيمىنىڭ ەنگىزىلۋىنە بايلانىستى كاپيتالدى شەتەلگە شىعارۋ، ونىڭ ىشىندە جالعان مامىلەلەر جاساۋ ارقىلى شەتەلگە شىعارۋ تاۋەكەلىنىڭ ۇدەي تۇسكەنىن اتاپ ءوتتى»، - دەدى ۇلتتىق بانك باسشىسى.
وسىعان بايلانىستى 10-قاڭتاردا ۇلتتىق بانك قارجىلىق مونيتورينگ اگەنتتىگىمەن جانە قارجى نارىعىن رەتتەۋ جانە دامىتۋ اگەنتتىگىمەن بىرلەسە وتىرىپ ەلدەن زاڭسىز اقشا شىعارۋعا باقىلاۋدى كۇشەيتۋ بويىنشا بىرلەسكەن بۇيرىق قابىلداعان.
«جوعارىدا اتالعان بۇيرىققا سايكەس وپەراتسيالار جۇرگىزۋگە ارنالعان وتىنىمدەر بويىنشا ءىس- قيمىلدار الگوريتمى قابىلداندى، سونداي- اق كۇشەيتىلگەن قارجىلىق مونيتورينگ جۇرگىزىلۋى ءتيىس ترانسشەكارالىق وپەراتسيالاردىڭ تىزبەسى بەكىتىلدى. تالاپتار ايقىن بۇزىلعان جاعدايدا، مۇنداي وپەراتسيالار جەدەل توقتاتىلاتىن بولادى. قابىلدانىپ جاتقان شارالار اقشانى جىلىستاتۋعا قارسى كۇرەستىڭ ەڭ ۇزدىك الەمدىك پراكتيكاسىنا نەگىزدەلەدى جانە KYC know your client قاعيداتتارىن تولىققاندى ەنگىزەدى»، - دەدى ەربولات دوسايەۆ.
سونداي- اق، ول اتالعان شارالار كاپيتالدىڭ ترانسشەكارالىق اعىندارىنىڭ بارىنشا ايقىندىلىعىن قامتاماسىز ەتۋگە مۇمكىندىك بەرەتىنىن اتادى.
«رەزيدەنتتەر مەن بەيرەزيدەنتتەردى قوسا العاندا، سىرتقى ەكونوميكالىق قىزمەتتىڭ ادال قاتىسۋشىلارى مەن ينۆەستورلاردىڭ حالىقارالىق وپەراتسيالار جۇرگىزۋى كەزىندە ءوز قۇقىقتارىنا قىسىم جاسالمايتىنىن جانە شەكتەۋ قويىلمايتىنىن راستاعىم كەلەدى»، - دەدى ۇلتتىق بانك ءتوراعاسى.
