مەملەكەت باسشىسى جولداۋدا ساياسي رەفورمالاردىڭ جاڭا پاكەتىن تانىستىرادى
بۇگىن پارلامەنت ءماجىلىسىنىڭ جالپى وتىرىسىندا مەملەكەت باسشىسى قاسىم-جومارت توقايەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.
«قىركۇيەك ايىنداعى ءداستۇرلى جولداۋىمدا ساياسي رەفورمالاردىڭ جاڭا پاكەتىن تانىستىرامىن. ول ازاماتتىق قوعام جانە ساراپشىلارمەن كەڭەيتىلگەن ءارى كونسترۋكتيۆتى ديالوگ نەگىزىندە دايىندالادى. مەملەكەت ءوزىنىڭ بازالىق فۋنكتسيالارىنىڭ تولىققاندى جانە ساپالى ورىندالۋىن قامتاماسىز ەتۋى ءتيىس»، - دەدى مەملەكەت باسشىسى.
سونىمەن قاتار پرەزيدەنت مەملەكەت زاڭدىلىق پەن قۇقىقتىق ءتارتىپتىڭ ورىندالۋىنا، جەكەمەنشىككە قۇقىقتى جانە ازاماتتار قۇقىقتارى قاۋىپسىزدىگىنىڭ قورعالۋىنا كەپىلدىك بەرىپ، الەۋمەتتىك يگىلىك پەن مەملەكەتتىك قىزمەتتىڭ ساپاسىن قامتاماسىز ەتۋى كەرەك ەكەنىن اتاپ ءوتتى.
ءوز كەزەگىندە بيزنەس پەن ازاماتتار زاڭنامانىڭ جانە قوعامدىق ءتارتىپ نورمالارىنىڭ ساقتالۋىنا، سالىقتاردىڭ ءادىل تولەنۋى مەن ەڭبەك قاتىناستارىنىڭ اشىقتىعىنا جاۋاپكەرشىلىكپەن قاراۋى ءتيىس.
وسىعان بايلانىستى جۇيەلى تۇرلەنۋ باعدارلاماسىن قالىپتاستىرۋ ماڭىزدى.
«ۇكىمەتكە جاۋاپتى ساراپشىلىق قوعامداستىقپەن جانە ازاماتتىق قوعاممەن بىرلەسە ءتيىستى ۇسىنىستاردىڭ پاكەتىن ازىرلەۋدى تاپسىرامىن. ول ۇلتتىق قوعامدىق سەنىم كەڭەسى وتىرىستارىنىڭ بىرىندە قارالادى»، - دەدى مەملەكەت باسشىسى.
