پرەزيدەنت قىزمەتىن بەرمەي، جىلدار بويى وتىراتىن شەنەۋنىكتەردى سىنعا الدى
«مەملەكەتتىك باسقارۋ سالاسىنا دا كەشەندى رەفورما كەرەك. اتالعان سالاعا ءتان بىرنەشە پروبلەما بار. ول كادرلىق پوتەنتسيالدىڭ تومەندىگى، جەمقورلىق، فورمالدىلىق جانە كادر تاپشىلىعى مەن تۇراقتاماۋى. سوندىقتان دا حالىقتىڭ مەملەكەتتىك باسقارۋ مەن بيلىككە دەگەن سەنىمى تومەن. وسى ورايدا مەملەكەتتىك قىزمەتكە الۋ تالابىن جەتىلدىرۋ قاجەت. قىزمەتكە الۋ تالابىنىڭ ارتىق، كەرەك ەمەس تۇستارىن الىپ تاستاۋ كەرەك جانە مەملەكەتتىك قىزمەتكە كەلگىسى كەلەتىندەر ءۇشىن ەش كەدەرگى بولماۋى ءتيىس»، - دەدى قاسىم-جومارت توقايەۆ ءماجىلىس وتىرىسىندا.
مەملەكەت باسشىسىنىڭ ايتۋىنشا، مەملەكەتتىك قىزمەتكە ىرىكتەۋ ءادىل ءارى جوعارى دەڭگەيدە ءوتۋى ءتيىس.
«ەلگە قىزمەت ەتەمىن دەگەن كەز كەلگەن قازاقستاندىق ءۇشىن مەملەكەتتىك قىزمەت اشىق بولعانى ءجون. سونداي-اق، مەملەكەتتىك قىزمەتتەن كەتۋ پروتسەسىن دە قايتا قاراۋ كەرەك. ويتكەنى، كەيبىر شەنەۋنىكتەر كابينەتىندە جىلدارىن وتكىزەدى. ولار جاس مامانداردىڭ وركەندەۋىنە جول بەرمەي، مەملەكەتتىك اپپاراتتىڭ تيىمدىلىگىن تومەندەتە تۇسۋگە اسەرىن تيگىزۋدە. ونداي شەنەۋنىكتەرمەن قوشتاسۋ كەرەك. دەگەنمەن مەملەكەتتىك باسقارۋ سالاسىندا شەنەۋنىكتىڭ ينستيتۋتسيونالدىق جادى دا ماڭىزدى. ياعني ءبىر كۇنگە بۇكىل شەنەۋنىكتى الىپ تاستاپ، ولاردى جاستارعا اۋىستىرۋ دا ءجون ەمەس. بۇل جەردە سالماقتى شەشىم قاجەت. ەگەر 60 جاستاعى شەنەۋنىك ءوز قىزمەتىن ويداعىداي اتقارىپ، مەملەكەتكە پايداسىن تيگىزىپ وتىرسا ونداي مامانعا تيىسپەۋ كەرەك»، - دەيدى ول.
سونداي-اق، پرەزيدەنت ۇكىمەت پەن مەملەكەتتىك قىزمەت جونىندەگى اگەنتتىككە مەملەكەتتىك باسقارۋدىڭ جاڭا مەحانيزمىن ازىرلەۋدى تاپسىردى.
