پرەزيدەنت ۇكىمەتتىڭ جاڭا قۇرامىنىڭ الدىندا تۇرعان باستى مىندەتتەردىڭ ءبىرىن اتادى
بۇگىن پارلامەنت ءماجىلىسىنىڭ جالپى وتىرىسىندا مەملەكەت باسشىسى قاسىم-جومارت توقايەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.
پرەزيدەنت ۇكىمەت بۇكىل ونەركاسىپ سالاسىنا تەرەڭ تالداۋ جۇمىسىن جۇرگىزۋى ءتيىس ەكەنىن تاپسىردى.
«شيكىزات قورىن، قۇزىرەتتەرى مەن ەكونوميكالىق تيىمدىلىكتى ەسكەرە وتىرىپ، باسەكەگە قابىلەتتى سەكتورلاردى انىقتاۋ كەرەك. جۇرگىزىلگەن تالداۋدىڭ نەگىزىندە، ناقتى جوبالاردى ازىرلەپ، ينۆەستورلاردى تارتۋ قاجەت. بۇل ۇكىمەتتىڭ جاڭا قۇرامىنىڭ الدىندا تۇرعان باستى مىندەتتەردىڭ ءبىرى»، - دەدى مەملەكەت باسشىسى.
بۇدان بۇرىن حابارلانعانداي، پرەزيدەنت «سامۇرىق- قازىنا» قورى مەن ونداعى شەتەلدىك مامانداردى سىنادى.
«ەكونوميكالىق ءوسىم مەملەكەتتىڭ ەكونوميكاداعى ۇلەسىن ازايتۋمەن تىعىز بايلانىستى. ءبىراق جەكەشەلەندىرۋ جۇيەلى جانە اشىق جۇرگىزىلىپ جاتقان جوق. اتاپ ايتقاندا، باسەكەلەستىك ورتاعا بەرىلۋى ءتيىس اكتيۆتەردى ىرىكتەۋ تاسىلدەرى ايقىندالماعان. ونى شۇعىل ازىرلەۋ قاجەت»، - دەدى مەملەكەت باسشىسى.
