قاسىم-جومارت توقايەۆ مۇعالىم تاپشى وڭىرلەردىڭ ماسەلەسىن شەشۋدىڭ جاڭا ءتاسىلىن ۇسىندى
«ساپالى بىلىمگە قولجەتىمدىلىكتى ارتتىرۋ ءسوزسىز باسىم باعىت بولىپ تابىلادى. بۇل - بۇكىل قوعام دامۋىنىڭ اسا ماڭىزدى فاكتورى. ءبىز مەكتەپتەردى قالاي ماتەريالدىق جاعىنان قامتاماسىز ەتسەك تە، ءبىلىم ساپاسىن جاقسى مۇعالىمدەرسىز كوتەرۋ مۇمكىن ەمەس»، - دەدى قاسىم-جومارت توقايەۆ ق ر پارلامەنتى ءماجىلىسىنىڭ وتىرىسىندا.
سونداي-اق، ول مۇعالىم تاپشى وڭىرلەرگە ۇزدىك پەداگوگتاردى تارتۋدىڭ جاڭا ءتاسىلىن ۇسىندى.
«ۇلى احمەت بايتۇرسىن ۇلى ايتقانداي، مۇعالىم - مەكتەپتىڭ جۇرەگى. سوندىقتان مەن مۇعالىمدەر تاپشىلىعى بار وڭىرلەرگە ۇزدىك پەداگوگتاردى تارتۋدىڭ ارنايى قولداۋ پاكەتتەرى بار ارنايى باعدارلاماسىن ازىرلەۋدى تاپسىرامىن»، - دەدى مەملەكەت باسشىسى.
ەسكە سالساق، ق ر پرەزيدەنتى قاسىم-جومارت توقايەۆ پارلامەنت ءماجىلىسىنىڭ وتىرىسىندا ق ر پرەمەر-ءمينيسترى لاۋازىمىنا ءاليحان سمايىلوۆتىڭ كانديداتۋراسىن ۇسىنىپ، ونى ءماجىلىس قابىلدادى. پرەزيدەنت جۋىقتا قازاقستاندى ساياسي ترانسفورماتسيالاۋ جونىندەگى جاڭا ۇسىنىستارىن جاريالايتىنىن ايتقان. سونداي-اق، ول 7-قاڭتاردا حالىققا جاساعان ۇندەۋىندە ۇكىمەتكە بۇگىنگى ءماجىلىس وتىرىسىندا ناتقى تاپسىرمالار بەرەتىنىن ايتقان ەدى.
«ۇكىمەت مەنىڭ 11-قاڭتاردا ماجىلىستە ايتاتىن سوزىمە قاتىستى ناقتى شەشىمدەر قابىلداۋى كەرەك»، - دەگەن مەملەكەت باسشىسى.
اۆتور: ەسىمجان ناقتىباي
