استانادا ازىق-تۇلىك تاۋارلارىنىڭ تاپشىلىعى جوق - اكىم ورىنباسارى
قالا اكىمىنىڭ ورىنباسارى ەرلان بەكمۇرزايەۆ نۇر-سۇلتاندا ازىق-تۇلىك تاپشىلىعى جوق ەكەنىن اتاپ ءوتتى، دەپ حابارلايدى قازاقپارات اكىمدىكتىڭ رەسمي سايتىنا سىلتەمە جاساپ.
«قالانىڭ ساۋدا نىساندارىنا مونيتورينگ جۇرگىزەمىز. ەلوردا اۋماعىندا ازىق-تۇلىك تاۋارلارىنىڭ تاپشىلىعى جوق. قالانىڭ پەريمەترى بويىنشا 6 بلوكپوست قويىلعان. بارلىق بلوكپوستار بويىنشا العاشقى كۇننەن باستاپ ازىق-تۇلىك ونىمدەرىن كىرگىزۋ جانە جەتكىزۋ بويىنشا ۇزدىكسىز جۇمىس جولعا قويىلدى. ازىق-تۇلىكتى جەتكىزۋگە قاتىستى ىركىلىستەر جوق. بارلىق ساۋدا نىساندارى كومەندانتتىڭ بۇيرىعىمەن شتاتتىق رەجيمدە جۇمىس ىستەيدى. رۇقسات ەتىلگەن ۋاقىت تاڭعى ساعات 8 دەن 22:00 گە دەيىن»، - دەدى ەرلان بەكمۇرزايەۆ.
ەلوردا اكىمىنىڭ ورىنباسارى بارلىق كاسىپكەرلەردى نۇر-سۇلتان قالاسىنىڭ كومەندانتى ازىرلەگەن ەرەجەلەردى ساقتاۋعا، اتاپ ايتقاندا، سورەلەردەن الكوگول ونىمدەرىن الىپ تاستاۋعا، بەلگىلەنگەن رەجيم مەن جۇمىس كەستەسىن ساقتاۋعا شاقىردى.
«ا ك ك ارىپتەستەرىمەن بىرلەسىپ الەۋمەتتىك ماڭىزى بار ازىق-تۇلىك تاۋارلارىنىڭ باعاسىنا كۇن سايىن مونيتورينگ جۇرگىزەمىز. باعانى كوتەرگەن جاعدايدا كاسىپكەرلەرگە ەڭ قاتاڭ شارالار قولدانىلادى»، - دەدى ول.
اكىمدىك وكىلدەرى قالانىڭ ءىرى ساۋدا جەلىلەرىنىڭ فيليالدارىنا باردى.
ايتا كەتەيىك، ەلوردالىق ساۋدا سورەلەرىندە تاۋار جەتىسپەۋشىلىگى بايقالمايدى.
«قازىرگى ۋاقىتتا نۇر-سۇلتان قالاسىندا Magnum جەلىسىنىڭ بارلىق فيليالدارى اشىلعان. فيليالداردىڭ جۇمىس ءتارتىبى ت ج رەجيمىنە سايكەس انىقتالعان. جاعداي تۇراقتانعان سايىن فيليالداردىڭ جۇمىس ۋاقىتى ارتادى. فيليالداردا دۇرلىگىپ جاتقان حالىق بايقالمايدى، بارلىق الەۋمەتتىك ماڭىزى بار تاۋار قولدا بار. تاۋارلاردى جەتكىزۋ كەستە بويىنشا جۇرگىزىلەدى، باعالار تۇراقتى. ءبىز باعانى كوتەرمەدىك. بىزبەن ءبىر كوماندا رەتىندە جۇمىس ىستەگەنىڭىز ءۇشىن سەرىكتەستەرىمىزگە راحمەت. الكوگول ساتىلىمنان الىنىپ تاستالدى جانە، ساتىلمايدى»، - دەپ حابارلادى Magnum كومپانياسىنىڭ اۋماقتىق ديرەكتورى ەلەنا زيمەنكو.
«توتەنشە جاعداي رەجيمىن ەنگىزۋ دۇكەندەردىڭ جۇمىسىنا اسەر ەتكەن جوق، بىزدە بارلىق تاۋارلار بار، تەك ءبىزدىڭ دۇكەندە عانا ەمەس، بۇكىل جەلىدە دە بار. سابىرلىق ساقتاۋ كەرەك. ساتىپ الۋشىلاردان دۇرلىكپەي، قاجەتتىلىگىنە قاراي ساتىپ الۋدى سۇرايمىز، ويتكەنى تاۋار بارلىعىنا جەتەدى»، - دەيدى «انۆار» گيپەرماركەتىنىڭ ديرەكتورى ناتاليا كراستىن.
