الماتى وبلىسى اكىمىنىڭ ورىنباسارى جاپپاي ەرەۋىل كەزىندە سوققىعا جىعىلدى
بۇل تۋرالى ءوڭىر اكىمىنىڭ كەڭەسشىسى عالىمۇرات جۇكەل ايتتى، دەپ حابارلايدى قازاقپارات.
سونىمەن بىرگە، كەڭەسشى اكىمنىڭ ورىنباسارى قايتىس بولدى دەگەن اقپاراتتى رەسمي تۇردە جوققا شىعاردى.
«بۇل اقپاراتتى رەسمي تۇردە جوققا شىعارامىن جانە ونىڭ امان ەكەنىن ايتقىم كەلەدى. ول 5- قاڭتاردا تارتىپسىزدىك كەزىندە جاراقات الدى. ونىمەن سويلەستىم، قازىر ەم الىپ جاتىر. جاعدايى تۇراقتى»، - دەدى اكىمنىڭ كەڭەسشىسى.
ونىڭ ايتۋىنشا، وبلىستاعى جاعداي تۇراقتانىپ كەلەدى، تالدىقورعان قالاسىنىڭ پەريمەترى بويىنشا جانە قالا ىشىندە بلوكپوستار قويىلعان. ءاربىر اۆتوكولىك پەن ادام تەكسەرىلىپ جاتىر. اكىمنىڭ كەڭەسشىسى قالا تۇرعىندارىنان ءماجبۇرلى شارالارعا تۇسىنىستىكپەن قاراۋدى جانە ۇيدەن شىقپاۋدى، كومەنداتۋرانىڭ بارلىق تالاپتارىن ساقتاۋدى سۇرايدى.
ودان بولەك، عالىمۇرات جۇكەل تارتىپسىزدىك كەزىندە ءىرى ازىق-تۇلىك حابى بولىپ سانالاتىن «التىن وردا» بازارى زارداپ شەككەنىن ايتتى.
قازىر بازار جۇمىس ىستەپ تۇر، وندا قاۋىپسىزدىك شارالارى كۇشەيتىلگەن.
ەسكە سالا كەتەيىك، قازىرگى ۋاقىتتا الماتى وبلىسىندا كۇش قۇرىلىمدارىنىڭ لاڭكەستىككە قارسى وپەراتسياسى جالعاسىپ جاتىر.
