قازاقستان اسكەريلەرى ەلدەگى توتەنشە جاعداي رەجيمىن قالاي قامتاماسىز ەتىپ جاتىر
ەڭ الدىمەن اسكەري بولىمدەردى، قارۋ-جاراق پەن وق-ءدارى قويمالارىن كۇزەتۋ كۇشەيتىلدى.
بۇل ءوز كەزەگىندە اسكەري قارۋ-جاراقتىڭ قىلمىسكەرلەردىڭ قولىنا تۇسۋىنە جول بەرمەدى.
سونداي-اق، اسكەري اۋە ايلاقتارىن، اۋەجايلاردى، حالىقتىڭ تىنىس-تىرشىلىگىن قامتاماسىز ەتۋ وبەكتىلەرىن كۇزەتۋ كۇشەيتىلدى.
قارۋلى كۇشتەردىڭ اسكەري قىزمەتشىلەرى اكىمشىلىك پەن قالانىڭ ورتالىق الاڭدارىن قورشاۋعا الۋعا جۇمىلدىرىلدى.
اسكەري قىزمەتشىلەردىڭ كوپشىلىگى ءدال وسى قاقتىعىستاردا زارداپ شەكتى. ويتكەنى بەيبەرەكەت ارەكەت ەتكەن ادامدار توبى سۋىق جانە اتىس قارۋلارىن، تاستاردى قولدانا وتىرىپ جولىنداعىنىڭ ءبارىن قيراتقان.
ەلدىڭ ءبىرقاتار ايماقتارىندا ەكسترەميستەر اسكەري بولىمدەرگە شابۋىل جاساۋعا تىرىستى.
دەگەنمەن، سودىرلارعا قارۋلى تويتارىس بەرىلىپ، ناتيجەسىندە ولار اسكەري نىساندارعا كىرە المادى.
قازىرگى ۋاقىتتا بارلىق ەلدى مەكەندەردە قارۋلى كۇشتەردىڭ اسكەري قىزمەتشىلەرى پوليتسيا جانە ۇلتتىق ۇلان قىزمەتكەرلەرىمەن بىرلەسىپ توسقاۋىل بەكەتتەرىندە قىزمەت وتكەرىپ، باقىلاپ-وتكىزۋدى جۇزەگە اسىرىپ، سونداي-اق ماڭىزدى وبەكتىلەردى كۇزەتەدى.
قارۋلى كۇشتەردىڭ اسكەري قىزمەتشىلەرى تەرروريزمگە قارسى وپەراتسيا جۇرگىزىلىپ جاتقان الماتى وڭىرىندە ەرەكشە جاۋاپتى جانە قاۋىپتى جاۋىنگەرلىك مىندەتتەردى ورىنداۋدا.
ارنايى جاۋىنگەرلىك ءىس-قيمىلدارعا وفيتسەرلەر مەن كەلىسىمشارت بويىنشا اسكەري قىزمەتشىلەر تارتىلدى.
ەل پرەزيدەنتى جاۋىنگەرلەردىڭ باتىلدىعىنا ەرەكشە نازار اۋداردى. مەملەكەت باسشىسى وتانداستارىمەن ماقتاناتىنىن ايتىپ، قازاقستاننىڭ ودان ءارى ءوسىپ-وركەندەيتىنىنە سەنىم ءبىلدىردى.
