الماتىعا ءۇش باعىتتان قورقاۋدىڭ ۇلكەن توبى سياقتى قارۋلى سودىرلار لاپ بەردى – توقايەۆ
«ۇسىنىلعان بارلىق فاكتىگە قاراماستان كەيبىر دەرەكوزدەرى قازاقستاندا بيلىكتىڭ بەيبىت شەرۋشىلەرمەن كۇرەسى ءجۇرىپ جاتقانىن ايتۋدا. بۇل مۇلدەم جالعان اقپارات. ءبىز ەشقاشان بەيبىت شەرۋشىلەرگە قارسى قارۋ قولدانعان جوقپىز، قولدانبايمىز دا. وسىنى بىلگەن قازاقستانعا شابۋىلداۋشىلار اگرەسسيانىڭ بىرنەشە تولقىنىن جاسادى»، - دەدى مەملەكەت باسشىسى ۇ ق ش ۇ ۇجىمدىق قاۋىپسىزدىك كەڭەسىنىڭ كەزەكتەن تىس سەسسياسىندا مەملەكەت باسشىسىنىڭ اتاپ وتۋىنشە، ءبىرىنشى كەزەڭدە بەيبىت نارازىلىقتار بولدى.
ودان كەيىن الماتىدا ساياسي ميتينگ ءوتتى. «سودان سوڭ قالاعا ءۇش باعىتتان قورقاۋدىڭ ۇلكەن توبى سياقتى قارۋلى سودىرلار لاپ بەردى. باستاپقىدا ولار وزدەرىن بەيبىت شەرۋشىلەر رەتىندە كورسەتتى. قۇقىق قورعاۋ كۇشتەرىن، ءتىپتى قالا تۇرعىندارىن جاڭىلىستىردى. ال سودان كەيىن تاريحتا الماتى تراگەدياسى دەپ اتالاتىن جايت ورىن الدى»، - دەدى قاسىم- جومارت توقايەۆ.
«الماتى مەن وزگە قالالاردا ناعىز شايقاس بولدى. ماسەلەن، الماتىدا پوليتسيا دەپارتامەنتىنىڭ عيماراتى ماڭىنداعى ۇرىس 2 تۇنگە سوزىلعان. پوليتسەيلەر تەرروريستەردىڭ شابۋىلىنا تويتارىس بەردى. ءبىر عانا الماتىدا 7 قارۋ دۇكەنى باسىپ الىنعان. بۇل - جاقسى دايىندىقتان وتكەن كاسىبيلەردىڭ، ونىڭ ىشىندە ارنايى ۆينتوۆكالارى بار سنايپەرلەردىڭ ارەكەتى»، - دەدى قاسىم- جومارت توقايەۆ ۇجىمدىق قاۋىپسىزدىك تۋرالى شارت ۇيىمىنىڭ كەزەكتەن تىس وتىرىسىندا.
پرەزيدەنت تەرروريستەردىڭ جەكە بايلانىس قۇرالى بولعانىن، ولاردىڭ اسكەريلەر مەن قۇقىق قورعاۋشىلاردىڭ فورماسىن كيگەنىن اتاپ ءوتتى.
«ولار ارسىز تۇردە جاپپاي تارتىپسىزدىك قاتىسۋشىلارىنىڭ اراسىنا جاسىرىنىپ، ءتىرى قالقان رەتىندە قولداندى. پوليتسەيلەر مەن اسكەري قىزمەتشىلەرگە سانى بويىنشا بەس ەسە كوپ بانديتتەر شابۋىل جاسادى، ولاردى اسقان قاتىگەزدىكپەن ازاپتادى، ەكى پوليتسيا قىزمەتكەرىنىڭ باسى كەسىلدى. اۋرۋحانالارعا دا ۆارۆارلىق شابۋىلدار بولدى. مەملەكەت رەسۋرسىن تۇگەسۋ ءۇشىن شابۋىل ۇيىمداستىرۋشىلار ۇلكەن مايدان اشتى. اگرەسسيا ءبىر ۋاقىتتا 11 ءوڭىردى قامتىدى»، - دەدى مەملەكەت باسشىسى.
ايتا كەتەيىك، بۇگىن ۇ ق ش ۇ ۇجىمدىق قاۋىپسىزدىك كەڭەسىنىڭ كەزەكتەن تىس سەسسياسى ءوتىپ جاتىر. جيىن قازاقستان تاراپىنىڭ باستاماسىمەن شاقىرىلدى.
ەسكە سالايىق ، ق ر پرەزيدەنتى قاسىم- جومارت توقايەۆ ۇ ق ش ۇ مۇشە ەلدەردىڭ باسشىلارىنان ەل اۋماعىنداعى تەرروريستىك قاۋىپتى ەڭسەرۋ ءۇشىن قازاقستانعا كومەك كورسەتۋدى سۇراعان بولاتىن.
اۆتور: مارلان جيەمباي
