قوستاناي جانە اقمولا پوليتسەيلەرى قازا تاپقانداردى ءبىر مينۋت ۇنسىزدىكپەن ەسكە الدى
شارانى قوستاناي وبلىسى پوليتسيا دەپارتامەنتىنىڭ باستىعى بەكەت ايماعامبەتوۆ وتكىزدى. «قازاقستان رەسپۋبليكاسىنداعى لاڭكەستىك ارەكەت سالدارىنان ادامداردىڭ قازا تابۋىنا بايلانىستى ەل پرەزيدەنتى 2022 -جىلدىڭ 10-قاڭتارىن جالپىۇلتتىق ازا تۇتۋ كۇنى دەپ جاريالادى. بەيبىت ازاماتتاردىڭ قاۋىپسىزدىگىن قامتاماسىز ەتۋ كەزىندە قارۋلانعان قىلمىسكەرلەردىڭ قولدارىنان پوليتسيا قىزمەتكەرلەرى مەن ۇلتتىق ۇلاننىڭ اسكەري قىزمەتكەرلەرى قازا تاپتى. ەرلىك پەن باتىرلىق كورسەتە وتىرىپ، ولار وزدەرىنىڭ قىزمەتتىك جانە اسكەري مىندەتتەرىن ورىندادى. ولار تۋرالى ەستەلىكتەر ارىپتەستەرى مەن بۇكىل قازاقستان حالقىنىڭ جۇرەگىندە ماڭگى ساقتالادى»، - دەدى پوليتسيا ۆەدومستۆوسىنىڭ جەتەكشىسى. ءتارتىپ ساقشىلارى قازىرگى كەزدە قىلمىسكەرلەردى ىزدەستىرۋ مەن قاماۋعا الۋ ماقساتىندا بارلىق شارالاردى جۇزەگە اسىرىپ جاتىر. قوستاناي وبلىسىندا وپەراتسيا باستالعاننان بەرى ىشكى ىستەر ورگاندارىنا 700 ادام جەتكىزىلدى، 281 ادامعا قاتىستى توتەنشە جاعداي رەجيمىن بۇزعانى ءۇشىن اكىمشىلىك حاتتاما تولتىرىلدى.
سونداي-اق، اقمولالىق پوليتسەيلەردە تەرراكتىدەن قازا بولعانداردى ءبىر مينۋت ۇنسىزدىكپەن ەسكە الدى. اعىمداعى جىلدىڭ 10-قاڭتارى قازاقستان رەسپۋبليكاسىندا جالپىۇلتتىق ازا تۇتۋ كۇنى بولىپ جاريالاندى.
اقمولا وبلىستىق پوليتسيا دەپارتامەنتىنىڭ قىزمەتكەرلەرى ەلىمىزدە لاڭكەستەرمەن قاقتىعىستا قازا تاپقان قۇقىق قورعاۋ ورگاندارىنىڭ قىزمەتكەرلەرى مەن اسكەري قىزمەتشىلەردى ءبىر مينۋت ۇنسىزدىكپەن ەسكە الدى، دەپ حابارلايدى قازاقپارات ءتىلشىسى ۆەدومستۆونىڭ باسپا ءسوز قىزمەتىنە سىلتەمە جاساپ.
«بەيبىت ازاماتتاردىڭ قاۋىپسىزدىگىن قامتاماسىز ەتۋ جانە تەرروريستەردىڭ شابۋىلىنا تويتارىس بەرۋ كەزىندە 8 پوليتسيا قىزمەتكەرى مەن ۇلتتىق گۆارديانىڭ اسكەري قىزمەتشىلەرى قارۋلى قىلمىسكەرلەردىڭ قولىنان قازا تاپتى. ەرلىك پەن باتىرلىقتى كورسەتە وتىرىپ، ولار وزدەرىنىڭ قىزمەتتىك جانە اسكەري بورىشىن سوڭىنا دەيىن ورىندادى. ولار تۋرالى ەستەلىك ارىپتەستەرىنىڭ جانە بۇكىل قازاقستان حالقىنىڭ جۇرەگىندە ماڭگى ساقتالادى»، - دەپ اتاپ ءوتتى اقمولا وبلىسىنىڭ كومەندانتى ارمانبەك بايمۋرزين.
