اعزاڭىزدان «وميكرون» شتامىنا ۇقساس سيمپتومدار بايقاساڭىز نە ىستەۋ كەرەك

بۇل سۇراققا نۇر-سۇلتان قالاسى سانيتارلىق- ەپيدەميولوگيالىق قاداعالاۋ باسقاراماسى باسشىسىنىڭ ورىنباسارى جاننا پراليەۆا جاۋاپ بەردى، دەپ حابارلايدى قازاقپارات ءتىلشىسى.

«وميكروننىڭ» ەرەكشەلىگى بار، وتە تەز تارايدى. سوندىقتان قالا تۇرعىندارىنا ايتاتىنىمىز، وزدەرىن ناشار سەزىنسە، تاماقتارى اۋىرسا، ۇيدەن شىعۋدىڭ قاجەتى جوق. ويتكەنى اۋرۋ تەز ارادا تارايدى. دەمدە ءبىر- بىرىنە جۇعىپ كەتەدى. ماسكانى قايتادان تاعىپ ءجۇرۋ كەرەك. ويتكەنى ءبىز ءقازىر كوپ ادامداردىڭ دۇكەنگە كىرگەندە ماسكاسىز جۇرگەنىن بايقايمىز. «وميكرون» شتامى جاس تالعامايدى. ەرەسەكتەر دە، جاس بالالار دا اۋىرا بەرەدى»، - دەدى مامان.

ونىڭ ايتۋىنا قاراعاندا، «وميكرون» دەلتا- شتامعا قاراعاندا 70 ەسە جىلدام تارايدى.

«ەڭ ءبىرىنشى تاماق اۋرۋدان باستالادى. دەنە قىزۋى كوتەرىلەدى. تاعى ءبىر ەرەكشەلىگى - ادام تەز ارادا شارشاپ، جاتىپ قالادى. ەگەر تاڭەرتەڭ ويانعاندا ءوزىڭىزدى ناشار سەزىنسەڭىز، ۇيدەن شىعۋدىڭ قاجەتى جوق. ەگەر ناۋقاسپەن بايلانىستا بولعانىڭىزدى ۇقساڭىز، دارىگەرگە بارۋىڭىز كەرەك. ۆيرۋستى تاراتپاۋ ماڭىزدى. رەسپۋبليكانىڭ باس مەملەكەتتىك سانيتارلىق دارىگەرىنىڭ قاۋلىسى بويىنشا، بەس كۇننىڭ ىشىندە قالادا اۋرۋشاڭدىق وسسە، شەكتەۋلەر قابىلدانادى»، - دەدى جاننا پراليەۆا.

اۆتور: ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى