قازاق زيالىلارى ەلدە قالىپتاسقان جاعدايعا بايلانىستى حالىققا ۇندەۋ جاريالادى

قازاق ەلىنە ۇندەۋ

قادىرلى باۋىرلار! ءبىز - ادەبيەت جانە ونەر قايراتكەرلەرى، ەلدەگى جاعدايعا ۇلكەن الاڭداۋشىلىق ءبىلدىرىپ، كەلەسىنى مالىمدەيمىز. ەلىمىزدە قالىپتاسىپ وتىرعان قوعامدىق- ساياسي جاعداي وتە كۇردەلى. ىشتەن شىققان جاۋ مەن سىرتتان سوققان جاۋدىڭ قيتۇرقى ارەكەتتەرىنىڭ ناتيجەسىندە، ەل ءىشى ءبۇلىنىپ، قالالارىمىز قيراپ، ستراتەگيالىق نىساندارىمىز وتقا ورانىپ، بەيبىت تۇرعىندارىمىز زارداپ شەگىپ جاتىر. ءىرى ساۋدا ورتالىقتارى تونالىپ، بانكتەر مەن قوعامدىق ورىندار تالقاندالىپ، جارامسىز بوپ قالدى. سۇلۋ الماتىمىز ءالى كۇنگە دەيىن قارا تۇتىنگە تۇنشىعىپ تۇر. تۇرعىندارىمىزدىڭ كوزىندە ۇرەي، جۇرەگىندە الاڭ ورناپ الدى. سىرتتان مۇزداي قارۋلانعان ەكسترەميستتىك توپتار ەل ءىشىن الا تايداي ءبۇلدىرىپ، تىنىش ومىرىمىزگە ويران سالدى. مۇنداي سۇمدىق وقيعالاردى قازاقستان بۇرىن- سوڭدى كورگەن ەمەس. وزدەرىنىڭ پاسىق مۇددەلەرى ءۇشىن حالىق پەن قالالاردى قۇرباندىققا شالا سالۋعا دا بارىن سالاتىن زىميان ادامداردىڭ مۇنداي ورەسكەل ارەكەتتەرىن زيالى، كوزى اشىق ازاماتتار كورىپ وتىر جانە قاتاڭ ايىپتاۋدا. سوندىقتان، وسىنداي الاعاي دا بۇلاعاي شاقتا، ەلىمىز ءۇشىن تاريحي سىن ساعاتتا ءبىز زاڭدى تۇردە سايلانعان، بارلىق قۇزىرەتتى قولىنا العان پرەزيدەنتىمىز قاسىم- جومارت كەمەل ۇلى توقايەۆتىڭ قاسىناا توپتاسىپ، بىرلەسە قيمىلداپ، ەلدەگى جاعدايدى تۇراقتاندىرۋعا ءتيىسپىز. جانە كۇللى الاش جۇرتىن ءبىر جاعادان باس، ءبىر جەڭنەن قول شىعارىپ، ءبىر بولۋعا شاقىرامىز! قولىمىزداعى ەڭ قاسيەتتى، ەڭ كيەلى دەپ سانالاتىن ارداقتى تاۋەلسىزدىگىمىزدى ساقتاپ قالايىق! ەل امان بولسىن!

قۇرمەتپەن، 1. اسانالى ءاشىموۆ؛ 2. ءسابيت ورازبايەۆ؛ 3. سەيىت قاسقاباسوۆ 4. نۇرعالي ءنۇسىپجانوۆ 5. دۋلات يسابەكوۆ 6. كادىربەك سەگىزبايەۆ 7. بەكسۇلتان نۇرجەكەيەۆ 8. تەمىرحان مەدەتبەك 9. جابال ەرعاليەۆ 10. مولداحمەت قانازوۆ 11. التىنبەك قورازبايەۆ، 12. دوسحان جولجاقسىنوۆ 13. ۇلىقبەك ەسداۋلەت 14. تالعات تەمەنوۆ 15. سەكەن تۇرىسبەكوۆ 16. نەسىپبەك ايت ۇلى 17. ءجۇرسىن ەرمان 18. روزا رىمبايەۆا 19. مەرەكە قۇلكەنوۆ 20. قۇلبەك ەرگوبەك 21. كەنجەحان ماتىجانوۆ 22. انار فازىلجان 23. باۋىرجان جاقىپ 24. دۇكەن ءماسىمحان 25. بەكجان تۇرىس 26. مارالتاي رايىمبەك ۇلى 27. داۋرەن قۋات 28. ساكەن سىبانباي 29. باقىت بەدەلحان 30. مەيرامبەك بەسبايەۆ 31. داۋلەتكەرەي كاپ ۇلى 32. ەرعالي ءابدىرايىم 33. اقبەرەن ەلگەزەك

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى