ازا تۇتۋ كۇنى: جاماندىقتى اماندىق قانا جەڭەدى
«ەلىمىزدىڭ ءبىرقاتار وڭىرىندە بولعان قايعىلى وقيعالاردىڭ سالدارىنان ىشكى ىستەر، اسكەريلەر سالاسىنداعى ازاماتتارىمىز بەن بەيبىت تۇرعىنداردىڭ قازاسىنا بايلانىستى 10-قاڭتاردا جالپى ۇلتتىق ازا تۇتۋ كۇنى جاريالاندى. پرەزيدەنتتىڭ ءتيىستى جارلىعى شىقتى. مەملەكەت باسشىسى قاسىم- جومارت توقايەۆتىڭ بۇل شەشىمى - ەلدى سابىرلىققا، يماندىلىققا، اۋىزبىرشىلىككە شاقىرۋ شاراسى. ىقىلىم زاماننان سان قيىندىق پەن سىناقتى باستان كەشىرگەن حالقىمىزدى قاڭتارداعى قارا قۇيىن قاتتى كۇيزەلتتى. توتەننەن، بوتەننەن كەلگەندەرگە تابالاۋشى، ەلبۇزارلار قوسىلدى. حالىقتىڭ جيعان- تەرگەنى شاشىلدى، ىرىس- نەسىبە ءراسۋا بولدى. قالالارىمىزعا ويران سالىندى، قان توگىلدى. وتان ءۇشىن ءاربىر جاننىڭ قازاسى قاسىرەتتى. كەنەتتەن قايعى ارقالاعان وتباسىلار مەن اۋلەتتەردىڭ بارشاسىنا قايعىرىپ كوڭىل ايتامىز.
ۇلت ۇستازى احمەت بايتۇرسىن ۇلى: «اسىقپاڭدار! ارتىمىزدا قازى بار، تەرگەپ تالاي سۇيەكتەرىڭ قازىلار. قينامايدى اباقتىعا جاپقانى. قيىن ەمەس دارعا اسقانى، اتقانى. ماعان اۋىر وسىلاردىڭ بارىنەن. ءوز اۋىلىمنىڭ يتتەرى ءۇرىپ، قاپقانى» دەگەندەي سىن ساعاتتا ىشتەن شىققان جاۋىزداق، الاۋىزدىق پەن ارانداتۋشىلىق ەلگە اۋىر ءتيدى.
الەم نازارىنا ىلىككەن بۇلىكشىلىك ارەكەت مەملەكەت باسشىسىنان كونستيتۋتسياعا ساي ادىلەتتىلىكتى، سالقىنقاندىلىقتى، جاۋاپكەرشىلىكتى تالاپ ەتتى. ءتيىستى باتىل قادامدار جاسالدى، ولار جالعاساتىن بولادى. وسىنداي شيەلەنىستى شاقتا قيىندىققا شىداپ، توزگەن ەردى، ەر ەڭبەگىن سەزگەن ەلدى تانىدىق. ءيا، بىزگە قازىر سابىر قاجەت. سابىر - سەنىمنىڭ ارقاۋى. بىرلىك كەرەك، ول - ءۇمىتتىڭ، جاقسىلىقتىڭ باستاۋى. وسىنداي قايعى- قاسىرەتتى تەرەڭ سەزىنە وتىرىپ، قوعام جاۋاپكەرشىلىگىن، مەيىرىمى مەن اۋىزبىرشىلىگىن ايرىقشا ايتامىز. ويتكەنى، ءبىزدىڭ ەلىمىزدىڭ ەڭ قىمبات قازىناسى
- ادام، ونىڭ ءومىرى، قۇقىعى مەن بوستاندىعى. ءبىز قۋانىشتا دا، قايعىدا دا بىرگەمىز. جاراتقان يە مارقۇمدارعا - يمان، تىرىلەرگە بەرەكە بەرسىن! جاماندىقتى اماندىق قانا جەڭەدى. اشىق اسپانىمىز ەندى ەشقاشان قارا بۇلت تورلاماسىن».
