ق ر قورعانىس مينيسترلىگى مەن ۇ ق ش ۇ ۇجىمدىق بىتىمگەرشىلىك كۇشتەر قولباسشىلىعى مالىمدەمە جاسادى
مالىمدەمە ءماتىنى ق ر قورعانىس مينيسترلىگىنىڭ سايتىندا ورنالاستىرىلدى. ق ر قورعانىس ءمينيسترى مىندەتىن اتقارۋشىنىڭ ورىنباسارى سۇلتان كامالەتدينوۆتىڭ ايتۋىنشا، قازاقستان اۋماعىندا تەرروريزمگە قارسى كۇرەس شارالارى جالعاسۋدا جانە ولار لاڭكەستەر تولىق جويىلعانشا جالعاسادى.
«قازاقستان رەسپۋبليكاسىنىڭ اۋماعىندا جاعداي تۇراقتالۋدا جانە بيلىك ورگاندارىنىڭ باقىلاۋىندا. ۇ ق ش ۇ ۇجىمدىق بىتىمگەرشىلىك كۇشتەرىنىڭ قولباسشىلىعىنا جانە جەكە قۇرامىنا قازاقستان حالقىنا كورسەتكەن باۋىرلاستىق كومەكتەرى ءۇشىن العىس ايتقىم كەلەدى. بىتىمگەرلەردىڭ اناعۇرلىم ماڭىزدى وبەكتىلەردى كۇزەتكە الۋى، قۇقىق قورعاۋ ورگاندارى مەن قارۋلى كۇشتەردىڭ تەرروريستەرگە قارسى كۇرەسكە جىبەرىلگەن كۇشتەرى مەن قۇرالدارىنىڭ ەداۋىر بولىگىن بوساتۋعا مۇمكىندىك بەردى. قازىرگى ۋاقىتتا قازاقستان رەسپۋبليكاسىنىڭ اۋماعىندا تەررورعا قارسى وپەراتسيا جالعاسۋدا. ول تەرروريستەردى تولىق جويعانعا دەيىن جۇرگىزىلەتىن بولادى»، - دەدى سۇلتان كامالەتدينوۆ.
ۇ ق ش ۇ بىتىمگەرشىلىك كۇشتەرىنىڭ قولباسشىسى اندرەي سەرديۋكوۆ الماتىدا دەمالىستا نەمەسە تۋىستارىنىڭ جانىندا جۇرگەن رەسەي ازاماتتارىن ۇشاقپەن وتانىنا جىبەرۋ ۇيىمداستىرىلعانىن ءمالىم ەتتى.
«ۇ ق ش ۇ ۇجىمدىق قاۋىپسىزدىك كەڭەسىنىڭ شەشىمىنە سايكەس ۇجىمدىق بىتىمگەرشىلىك كۇشتەر قازاقستان رەسپۋبليكاسىنىڭ اۋماعىندا ورنالاسۋىن اياقتادى. قازىرگى ۋاقىتتا بىتىمگەرشىلىك كۇشتەر بولىمشەسى ماڭىزدى مەملەكەتتىك، اسكەري جانە الەۋمەتتىك ماڭىزى بار وبەكتىلەردى قورعاۋ جونىندەگى مىندەتتەردى ورىنداۋدا. اسكەري كونتينگەنتتەردى جەدەل ورنالاستىرۋ جانە قامتاماسىز ەتۋ ماسەلەلەرىن جەدەل شەشكەنى ءۇشىن قازاقستان تاراپىنا ريزاشىلىعىمدى بىلدىرەمىن. رەسەي اسكەري- عارىش كۇشتەرى اسكەري- كولىك اۆياتسياسىنىڭ ۇشاقتارى رەسەي فەدەراتسياسىنىڭ اۋماعىنا ورالۋعا نيەت بىلدىرگەن الماتى قالاسىندا دەمالىستا نەمەسە تۋىستارىنىڭ جانىندا جۇرگەن رەسەي ازاماتتارىن جىبەرۋدى ۇيىمداستىردى. ۇجىمدىق بىتىمگەرشىلىك كۇشتەر بولىمشەلەرىنىڭ مىندەتتەردى ورىنداۋى جاعداي تولىق تۇراقتالعانعا دەيىن جالعاساتىن بولادى»، - دەدى اندرەي سەرديۋكوۆ.
