قوستاناي وبلىسىندا قوعامدىق ءتارتىپ قالپىنا كەلدى - پوليتسيا دەپارتامەنتىنىڭ باسشىسى
كەيىنگى تاۋلىكتەر ىشىندە قوستاناي وبلىسىندا قوعامدىق ءتارتىپ قالپىنا كەلتىرىلدى. بۇل ۋاقىت ىشىندە پوليتسيا قىزمەتكەرلەرى وڭىردەگى احۋالدى تۇراقسىزداندىرۋعا تالپىنعان توپتاسقان ادامداردىڭ زاڭعا قايشى ارەكەتتەرىنىڭ جولىن كەستى.
«ءدال قازىر وبلىستا تۇراقتى جاعداي ساقتالۋدا. قوعامدىق ءتارتىپ 6- قاڭتارعا قاراعان تۇندە قالپىنا كەلتىرىلدى. توپتاسقان ادامداردىڭ زاڭعا قايشى ارەكەتتەرىنىڭ سالدارىنان ءبىر پوليتسيا قىزمەتكەرى زارداپ شەكتى. وقيعا ورنىن قاراۋ كەزىندە جانعىش سۇيىقتىق قۇيىلعان قۇتىلار تاركىلەندى. ونىڭ ۇستىنە ءبىر ازاماتتان تراۆماتيكالىق تاپانشا تاركىلەندى»، - دەپ ءمالىم ەتتى بەكەت ايماعامبەتوۆ.
قازىر وبلىستا توتەنشە جاعداي جاريالانعان، قوعامدىق ءتارتىپ كۇزەتى كۇشەيتىلگەن. قوعامدىق ءتارتىپتى بۇزعانى ءۇشىن پوليتسيا بولىمشەلەرىنە 245 ادام جەتكىزىلدى. ونىڭ ىشىندە 35 ادام بىردەن بوساتىلدى. بوساتىلعانداردىڭ اراسىندا كامەلەتكە تولماعاندار مەن ايەلدەر بار. قازىرگى تاڭدا زاڭعا قايشى ارەكەتتەردى قۇجاتقا قاتتاۋ جۇمىستارى ءجۇرىپ جاتىر.
وبلىستىڭ كومەنداتۋراسى ءوڭىر تۇرعىندارىن سابىر ساقتاپ، ارانداتقان ۇندەۋلەرگە ەرمەۋگە، توتەنشە جاعداي كەزەڭىندە قابىلدانىپ جاتقان شارالارعا تۇسىنىستىكپەن قاراۋعا شاقىرادى.
