تەرروريستەر قارۋ- جاراق ساقتالعان قويمالاردى باسىپ الۋدا
اقوردادا مەملەكەت باسشىسىنىڭ توراعالىعىمەن قاۋىپسىزدىك كەڭەسىنىڭ وتىرىسى ءوتتى. جيىندا ەلىمىزدىڭ تۇراقتىلىعىن شايقالتپاق بولعان تەرروريستىك جانە قىلمىستىق ارەكەتتەرمەن كۇرەس ماسەلەلەرى تالقىلاندى.
ءىس- شاراعا پارلامەنتتىڭ قوس پالاتاسىنىڭ باسشىلارى، پرەمەر- ءمينيستردىڭ مىندەتىن اتقارۋشى، پرەزيدەنت اكىمشىلىگىنىڭ باسشىسى، مەملەكەتتىك حاتشى، ۇ ق ك ءتوراعاسى، پرەمەر- ءمينيستردىڭ ورىنباسارى - سىرتقى ىستەر ءمينيسترىنىڭ، قورعانىس جانە ىشكى ىستەر مينيسترلەرىنىڭ مىندەتتەرىن اتقارۋشىلار قاتىستى. قاۋىپسىزدىك كەڭەسىنىڭ ءتوراعاسى قالىپتاسقان جاعدايدىڭ قيىندىعىن اتاپ ءوتىپ، ءبىرقاتار جەدەل شارا قابىلداۋ قاجەت ەكەنىن ايتتى. سونىمەن قاتار قازاقستانعا ناعىز تەرروريستەردى ايداپ سالعان كۇشتەردى اتادى.
- وسىعان بايلانىستى ءبىز ولارعا تويتارىس بەرۋ ءۇشىن تەرروريستەرگە قارسى وپەراتسيا جۇرگىزۋىمىز قاجەت. مەن تەرروريستەرگە قارسى شتابتى باسقارامىن. بۇزاقىلار جاساعان تەرروريستىك اكتىنىڭ ۇيىمداستىرۋشىلارى - ناعىز تەرروريستەر. ولاردىڭ قازىرگى ۋاقىتتا الماتى مەن باسقا دا قالالارداعى ىستەپ جاتقان جۇگەنسىزدىگى بىزگە بەلگىلى. ينفراقۇرىلىمداردى، ەڭ باستىسى، قارۋ- جاراق ساقتالعان قويمالاردى باسىپ الۋدا. ۋچيليشە كۋرسانتتارىمەن ۇرىس جۇرگىزىپ جاتىر. قازىرگى ۋاقىتتا الماتىنىڭ تۇبىندە قورعانىس مينيسترلىگىنىڭ اۋە- دەسانت بولىمشەلەرى ۇرىس جۇرگىزۋدە، - دەدى پرەزيدەنت.
پرەزيدەنت اتالعان تەرروريستىك توپتاردىڭ، شىن مانىندە، شەتەلدە ۇلكەن دايىندىقتان وتكەن حالىقارالىق تەرروريستەر ەكەنىن جانە ولاردىڭ قازاقستانعا جاساعان شابۋىلىن باسقىنشىلىق اكتى رەتىندە قاراستىرۋ قاجەت ەكەنىن ايتتى.
- وسىعان بايلانىستى قاۋىپسىزدىك القاسى جونىندەگى شارتقا سۇيەنە وتىرىپ، مەن ۇ ق ش ۇ مەملەكەتتەرىنىڭ باسشىلارىنا وسى تەرروريستىك قاۋىپتى ەڭسەرۋ ءۇشىن قازاقستانعا كومەك كورسەتۋدى سۇرادىم. شىن مانىندە، بۇل - قاۋىپ قانا ەمەس، بۇل - مەملەكەتتىڭ تۇتاستىعىنا نۇقسان كەلتىرۋ، ازاماتتارىمىزعا شابۋىل جاساۋ. ولار مەنەن، مەملەكەت باسشىسى رەتىندە تەز ارادا وزدەرىن قورعاۋدى سۇرايدى. ازاماتتارىمىزدىڭ يگىلىگىن، قاۋىپسىزدىگى مەن تىنىشتىعىن ويلاۋ - مەنىڭ كونستيتۋتسيالىق مىندەتىم. سوندىقتان ۇ ق ش ۇ- داعى ارىپتەستەرىمە بىلدىرىلگەن ءوتىنىش - ۋاقىتىلى ءارى تولىعىمەن دۇرىس قابىلدانعان شەشىم.
قازاقستان حالقى بۇل شەشىمدى قولدايتىنىنا سەنىمدىمىن. جۇمىلساق، ءسوزسىز، جەڭەمىز. تەرروريستىك توپتار ءىرى ينفراقۇرىلىمدىق وبەكتىلەرگە شابۋىل جاساۋدا. اتاپ ايتقاندا، الماتى اۋەجايى، بەس ۇشاق، ونىڭ ىشىندە شەتەلدىك تە ۇشاقتار باسىپ الىندى. وكىنىشكە قاراي، الماتى قالاسىنا شابۋىل جاسالىپ، قيراتۋعا جانە ۆانداليزمگە جول بەرىلدى. قالا تۇرعىندارى تەرروريستەر مەن قاراقشىلار شابۋىلىنىڭ قۇربانىنا اينالدى. سوندىقتان ءبىزدىڭ، ونىڭ ىشىندە وسىندا قاتىسىپ وتىرعان قازاقستان رەسپۋبليكاسى قاۋىپسىزدىك كەڭەسى مۇشەلەرىنىڭ مىندەتى - ەلىمىزدى سىرتقى قاۋىپتەن قورعاۋ ءۇشىن بارلىق قاجەتتى ءارى مۇمكىن بولعان شارالاردى قابىلداۋ، - دەدى قاسىم- جومارت توقايەۆ.
قاۋىپسىزدىك كەڭەسىنىڭ ءتوراعاسى ءوز سوزىندە تەرروريستەردىڭ اگرەسسياسىنا ۇشىراعان ەل ازاماتتارىنا ۇندەۋ جاسادى.
- قازاقستان رەسپۋبليكاسىنىڭ پرەزيدەنتى رەتىندە سىزدەردىڭ ومىرلەرىڭىزدى قورعاۋ ءۇشىن بارىمدى سالامىن. بىرگە جەڭىسكە جەتەمىز دەپ ويلايمىن. بۇل - ەل تاريحىنداعى كۇردەلى كەزەڭ. بۇل قالاي، نەگە بولدى دەگەن سۇراقتاردىڭ جاۋابىن انىقتاۋعا تۋرا كەلەدى. ءبىراق باستىسى، ەلىمىزدى، ازاماتتارىمىزدى قورعاۋ، - دەپ تۇيىندەدى مەملەكەت باسشىسى.
