نۇرلان نوعايەۆ ماڭعىستاۋلىقتارعا ۇندەۋ جولدادى
«ارداقتى ماڭعىستاۋلىقتار! بۇگىن تۇندە قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆتىڭ جارلىعىمەن ماڭعىستاۋ وبلىسى جانە الماتى قالاسىندا توتەنشە جاعداي جاريالاندى. بۇگىن تاڭەرتەڭ ەلىمىزدىڭ پرەزيدەنتى قاسىم-جومارت كەمەل ۇلى ۇكىمەت پەن مەملەكەتتىك ورگانداردىڭ باسشىلارىمەن جينالىس وتكىزدى. جينالىس بارىسىندا قالىپتاسقان جاعدايدى قىسقا ۋاقىتتا ەكى جاققا دا ءتيىمدى بولاتىن جاعدايدا شەشۋ جونىندە ناقتى تاپسىرمالار بەرىلدى»، - دەدى ول ۆيدەو ۇندەۋدە.
وبلىس باسشىسى ءوز ەركىمەن قايتقاندارعا زاڭ اياسىندا ەشقانداي شارا قولدانىلمايتىنىن اتاپ ءوتتى.
«قازىرگى تاڭدا بىلمەستىكپەن نەمەسە ءار ءتۇرلى سەبەپتەرمەن وسىنداي شارالارعا قاتىسىپ جۇرگەن ازاماتتاردان ءوز ەركىلەرىمەن ارانداۋشىلىققا ەرمەي، ۇيلەرىنە قايتۋلارى سۇرالادى. ەگەر ءوز ەركىلەرىمەن قازىر قايتاتىن بولسا، قولدانىستاعى زاڭنىڭ اياسىندا ەشقانداي شارالار قولدانىلمايدى. ءوز تاراپىمىزدان ءىس-ارەكەتتەردىڭ بارلىعى قولدانىستاعى زاڭنىڭ اياسىندا قاتاڭ باقىلاۋدا بولا وتىرىپ، جۇزەگە اسىرۋ كەرەك ەكەنىن قاپەرىڭىزگە بەرەمىن»، - دەدى نۇرلان نوعايەۆ.
سونداي-اق ايماق باسشىسى ءبىرىنشى كەزەكتە ازاماتتاردىڭ دەنساۋلىعى مەن ومىرىنە قاۋىپ توندىرمەۋ ماسەلەلەرىنە دەن قويىلتانىن ايتتى.
«ءبىز ءوز تاراپىمىزدان قالىپتاسقان جاعدايدى تەزىرەك شەشۋگە جانە مەملەكەت باسشىسىنىڭ بەرگەن تاپسىرمالارىنىڭ اياسىندا تۇراقتىلىقتى قامتاماسىز ەتۋگە، ازاماتتاردىڭ دەنساۋلىعى مەن ومىرىنە قاۋىپ توندىرمەۋ ماسەلەلەرىنە دەن قويامىز. پرەزيدەنتتىڭ تاپسىرماسىنا سايكەس، ازاماتتىق جانە اسكەري وبەكتىلەردە قورعاۋ ماسەلەلەرىن ۇيىمداستىرۋ جانە سول وبەكتىلەرگە قانداي ءبىر قاستاندىق نەمەسە جۇمىسىن ىستەۋگە كەدەرگى كەلەتىن ماسەلەلەردى بولدىرماۋ جونىندە تاپسىرمالار بەرىلدى. ارداقتى اعايىن، بىرىگىپ وسى ماسەلەنى شەشەيىك. اماندىقتا بولايىق»، - دەدى وبلىس اكىمى ماڭعىستاۋلىقتارعا.
ەسكە سالساق، ق ر پرەزيدەنتى قاسىم-جومارت توقايەۆ الماتى وبلىسىندا توتەنشە جاعدايدى ەنگىزۋ تۋرالى جارلىققا قول قويدى. بۇعان دەيىن الماتى قالاسى مەن ماڭعىستاۋ وبلىسىندا توتەنشە جاعداي ەنگىزىلدى.
اۆتور: ەسىمجان ناقتىباي
