الماتى وبلىسىنىڭ تۇرعىندارى ءىلبىستى تابيعي ورتاسىنا قايتارۋعا سەبەپشى بولدى

بۇل تۋرالى ەكولوگيا، گەولوگيا جانە تابيعي رەسۋرستار مينيسترلىگىنىڭ باسپا ءسوز قىزمەتى مالىمەت تاراتتى. وقيعا 3- قاڭتار كۇنى بولعان. ساعات 12:00-لەر شاماسىندا كەربۇلاق كەنتىنىڭ ءامىرحان اعامبايەۆ، سايات اكتاي جانە بەكداۋلەت جەڭىس ۇلى دەيتىن تۇرعىندارى ەلدى مەكەن ماڭىنداعى دالادا جالعىز قالعان ءىلبىستى (قار بارىس) بايقايدى. تاۋتاننىڭ ادام جاقىنداسا دا قاشپايتىنىن، ءتىپتى بوي تاسالاۋعا دا تىرىسپاعانىن بايقاپ، تۇرعىندار ءتيىستى ماماندارعا حابار بەرگەن.

«التىنەمەل» مەملەكەتتىك ۇلتتىق تابيعي پاركى مەن «وحوتزووپروم» ر م ق ك ينسپەكتورلارى كەلگەنشە تۇرعىندار جىرتقىشتى تاسا قىلماي كۇتكەن. «تابيعي پارك ينسپەكتورلارى زوولوگيا ينستيتۋتىنىڭ عىلىمي قىزمەتكەرلەرىمەن بىرلەسىپ، جىرتقىشتى «التىنەمەل» پاركىنىڭ اۋماعىنا جەتكىزدى. ساعات 20.00 شاماسىندا تاۋتاننىڭ موينىنا سپۋتنيككە جالعانعان مويىنباۋ تاعىلىپ، ۇيرەنشىكتى مەكەنىنە قويا بەردى. ايتا كەتۋ كەرەك، بۇل «التىنەمەل» اۋماعىندا تۇراتىن ىلبىستەرگە تاعىلعان ءۇشىنشى مويىنباۋ. فوتوتۇزاق كومەگىمەن الىنعان مالىمەتتەر بويىنشا، ساياباقتا 10-عا جۋىق ءىلبىس مەكەندەيدى. ۇلتتىق پارك وسى سيرەك كەزدەسەتىن جانۋارلاردى ساقتاۋ ءۇشىن بارلىق قاجەتتى شارالاردى قولعا الادى»، - دەپ جازادى مينيسترلىكتىڭ باسپا ءسوز قىزمەتى.

ءىلبىس (قار بارىسى) ق ر ۇكىمەتىنىڭ 2006 -جىلعى 31- قازانداعى N 1034 قاۋلىسى بويىنشا، سيرەك كەزدەسەتىن جانە قۇرىپ كەتۋ قاۋپى تونگىپ تۇرعان جانۋارلاردىڭ تىزبەسىنە ەنگىزىلگەن.

اۆتور: ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى