سۇيىتىلعان گاز باياعىدا قىمباتتاۋى كەرەك ەدى - ساراپشى

«سۇيىتىلعان گازدىڭ باعاسى باياعىدا ءوسۋى كەرەك ەدى. بۇل دا باسقا تاۋارلار سياقتى نارىقتىق تاۋار. ونىڭ نەگىزگى جابدىقتارى، ماتەريالدار، شىعىن ماتەريالدارى - يمپورتتالادى نەمەسە حالىقارالىق باعالارعا تىكەلەي بايلانىستى بولادى. مىسالى، مەتالل قازاقستاندا وندىرىلەدى، ءبىراق تولىعىمەن الەمدىك باعالارعا تاۋەلدى»، - دەدى ولجاس ءبايدىلدينوۆ قازاقپارات تىلشىسىنە بەرگەن سۇحباتىندا.

ونىڭ ايتۋىنشا، قازاقستاندا قازىر سۇيىتىلعان گازدىڭ باعاسى ءوڭىر بويىنشا دا، الەم بويىنشا دا ەڭ تومەن.

Global Petrol Prices مالىمەتتەرى بويىنشا، 27- جەلتوقساندا مۇناي وندىرەتىن ازەربايجاندا سۇيىتىلعان گاز ليترى 166 تەڭگە، رەسەيدە - 182، قىرعىزستاندا - 203، بەلارۋستە - 212، گرۋزيادا - 275، ۋكراينادا - 303 تەڭگە بولعان. بۇل بىزدەن بىرنەشە ەسە كوپ.

«2019 -جىلدان باستاپ سۇيىتىلعان گاز اشىق بيرجالىق الاڭداردا ساۋدالانادى جانە 2022 -جىلدىڭ باسىنان باستاپ نارىق باعانى سۇرانىس پەن ۇسىنىس نەگىزىندە قالىپتاستىرادى. كەز كەلگەن ادام ETS.kz بيرجالىق الاڭىندا اككرەديتاتسيادان وتە الادى جانە ساۋدا- ساتتىققا قاتىسۋعا نەمەسە ناتيجەلەرىن قاراۋعا قۇقىلى. بۇل دۇرىس شارا - بارلىق تاۋارلار مەن قىزمەتتەردىڭ باعاسى نارىق جاعدايىنا اۋىسۋى ءتيىس. ەنەرگەتيكا مينيسترلىگى دە، ماڭعىستاۋ وبلىسىنىڭ اكىمدىگى دە ساۋدا ساتتىققا ىقپال ەتە المايدى جانە ارالاسا المايدى»، - دەپ قورىتىندىلادى سپيكەر.

ايتا كەتەيىك، جىل باسىندا سۇيىتىلعان گاز وندىرۋشىلەر مۇناي ونىمدەرىن ەلەكتروندى ساۋدا ارقىلى ساتۋعا كوشتى. ەلەكتروندى ساۋداعا كوشۋ سۇرانىس پەن ۇسىنىس نەگىزىندە سۇيىتىلعان مۇناي گازىنىڭ باعاسىن تەڭدەستىرۋگە جانە جاڭا ءوندىرىس ورىندارىن قۇرۋعا ينۆەستيتسيالار تارتۋعا دا مۇمكىندىك بەرەدى. بۇعان دەيىن ماڭعىستاۋ وبلىسىنىڭ اكىمدىگى سۇيىتىلعان گاز باعاسىنىڭ قىمباتتاۋى تۋرالى پىكىر ءبىلدىردى جانە ءجيى قويىلاتىن سۇراقتارعا جاۋاپ بەردى.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى