ءبيبىسارا اساۋبايەۆا شاحماتتان الەم چەمپيونى اتاندى
بۇل تۋرالى ق ر مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ Facebook پاراقشاسىنان ءمالىم بولدى، دەپ حابارلايدى قازاقپارات.
ەستەرىڭىزگە سالا كەتەيىك ءبيبىسارا پولشادا ءوتىپ جاتقان الەم بىرىنشىلىگىندە «راپيدتە» ەكىنشى ورىن يەگەرى اتانعان بولاتىن.
«ال بۇگىن قازاقستاندىق شاحماتشى اتالمىش جارىستا «بليتستە» الدىنا جان سالماي جەڭىس تۇعىرىنان كورىندى. وتانداسىمىزدى جارقىن جەڭىسىمەن قۇتتىقتايمىز!» ، - دەلىنگەن حابارلامادا.
«قازاقستاندىق شاحماتشى ءبيبىسارا اساۋبايەۆا پولشادا وتكەن 2021 -جىلعى راپيد جانە بليتستەن الەم چەمپيوناتى (FIDE World Rapid and Blitz 2021) اياسىنداعى بليتس- تۋرنيردىڭ جەڭىمپازى اتاندى. جارىس باسىنان- اق ءبيبىسارا قارسىلاستارىنىڭ وق بويى وزىق كەتىپ، تۋرنير اياقتالۋعا ءبىر تۋر قالعاندا جەڭىسكە جەتتى. بۇل - وتاندىق سپورت ءۇشىن تاريحي وقيعا، ويتكەنى ءبىزدىڭ شاحماتشىمىز الەمدىك شاحمات تۇرلەرى تاريحىندا ەڭ جاس الەم چەمپيونى اتاندى»، - دەلىنگەن ق ر مادەنيەت جانە سپورت مينيسترلىگىنىڭ وسى وقيعاعا قاتىستى تاراتقان اقپاراتىندا.
بۇعان دەيىن قازاقستاندىق سپورتشى كلاسسيكالىق شاحماتتان 8، 10، 12 جانە 14 جاسقا دەيىنگى قىزدار اراسىندا الەم چەمپيونى، 7، 9 جاسقا دەيىنگى مەكتەپ وقۋشىلارى اراسىندا الەم چەمپيونى اتانعان. سونداي- اق، كۇنى كەشە عانا 17 جاسار ب. اساۋبايەۆا تاماشا ونەر كورسەتىپ، وسى الەم چەمپيوناتى اياسىندا راپيدتەن (جىلدام شاحماتتان) 2-ورىندى جەڭىپ العان بولاتىن.
بليتس ءتۋرنيرىنىڭ قورىتىندىسى بويىنشا، ەكىنشى ورىندى ەكى كۇن بۇرىن راپيدتەن الەم چەمپيونى اتانعان رەسەيلىك الەكساندرا كوستەنيۋك السا، رەسەيدىڭ تاعى ءبىر وكىلى ۆالەنتينا گۋنينا ءۇشىنشى ورىندى يەلەندى. اتاپ وتەيىك، راپيد جانە بليتستەن الەم چەمپيوناتى - سپورت جانكۇيەرلەرىنىڭ كوپشىلىگى ءۇشىن شاحمات كۇنتىزبەسىندەگى ەڭ سۇيىكتى جانە اسىعا كۇتەتىن وقيعالاردىڭ ءبىرى.
اۋقىمدى شاراعا 50 ەلدەن 200 گە جۋىق سپورتشى - الەم چەمپيوندارى مەن ۆيتسە- چەمپيوندارى، قازىرگى ەل چەمپيوندارى جانە الەمنىڭ رەيتينگى جوعارى شاحماتشىلارى قاتىستى. راپيد جانە بليتس بويىنشا الەم چەمپيوناتىنىڭ جالپى جۇلدە قورى 1000000 ا ق ش دوللارىن قۇرادى.
