دارەتحاناعا ءتۇسىپ كەتكەن ەكى بالانى قۇتقارعان پوليتسەي ماراپاتتالدى - فوتو

وقيعا جىل باسىندا سارىاعاش قالاسىندا بولعان ەدى. اۋداندىق پوليتسيا بولىمىنە حابارلاسقان جەرگىلىكتى تۇرعىن، 3 جاسار ۇلى مەن 10 جاسار قىزىنىڭ اۋلاداعى دارەتحانا ىشىنە ابايسىزدا ءتۇسىپ كەتكەنىن ايتىپ كومەك سۇراعان. حابارلامانى ءبىرىنشى بولىپ العان سارىاعاش ا پ ب ۋچاسكەلىك پوليتسيا ينسپەكتورلارى، پوليتسيا مايورى نۇرداۋلەت ەدىلوۆ پەن پوليتسيا كاپيتانى اسىل ەرەجەپوۆ، پوليتسيا اعا لەيتەنانتى ايسۇلتان ساپار وقيعا ورنىنان تابىلدى.

«5 مەترلىك اجەتحانا ىشىندەگى ءناجىس 10 جاسار قىزدىڭ يىعىنا دەيىن جەتكەن ەكەن. ال، جاس ءوسپىرىم قىز جانىنداعى 3 جاسار ءىنىسىن ناجىسكە باتىپ كەتپەسى ءۇشىن كوتەرىپ ۇستاپ تۇردى. بەتوننان جاسالعان اجەتحانا ەدەنىن تەمىر قۇرالمەن سوققىلاپ بۇزدىق. بالالارعا قاۋىپ تونبەسى ءۇشىن، وزىندىك ادىسپەن ارەكەت ەتتىك»، - دەيدى نۇرداۋلەت ەدىلوۆ.

ادام سياتىنداي ورىن اشىلعان سوڭ، پوليتسيا مايورى اجەتحانا ىشىنە ءتۇسىپ، بالالاردى امان ەسەن الىپ شىققان بولاتىن. وقيعاعا كۋا بولعان كورشىلەر دە ۋچاسكەلىك ينسپەكتورلارعا العىستارىن ايتىپ، ريزاشىلىقتارىن جەتكىزدى. جاڭا جىل مەرەكەسىنىڭ قارساڭىندا نۇرداۋلەت ەدىلوۆ ق ر پرەزيدەنتى ق. توقايەۆتىڭ جارلىعىمەن «ەرلىگى ءۇشىن» مەدالىمەن ماراپاتتالدى.

بۇگىندە ۋچاسكەلىك پوليتسيا ينسپەكتورى ارىپتەستەرىمەن بىرگە 21000 تۇرعىنى بار قاپلانبەك اۋىلدىق وكرۋگىندە قىزمەت ەتۋدە. كۇندەلىكتى وزىنە بەكىتىلگەن اۋماقتى ارالاپ، قىلمىستى بولدىرماۋ مەن الدىن الۋ جۇمىستارىن اتقارىپ كەلەدى.

اۆتور: قايرات زاينيشەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى