قانداسىمىز قۇرمەت تالاپقازىعا حالىق ءۇي الىپ بەردى
شىمكەنتتەگى سولتۇستىك ساياجاي مولتەك اۋدانىندا ورنالاسقان ۇيدە بارلىق جاعداي جاسالعان. تابيعي گاز قوسىلىپ، اۋىز سۋ جۇيەسى تارتىلعان. قوعامدىق كولىكتە ءدال ءۇيدىڭ ىرگەسىنەن ءجۇرىپ جاتىر.
«قۇرمەت تالاپقازى «قۇرمەت» گراموتاسىنا لايىق ەدى» دەگەن الەۋمەتتىك جەلىدە پىكىر كوبەيىپ كەتتى. كوپشىلىك «حالىق بولىپ باسپانا سىيلايىق» دەگەن ويلاردى دا ايتتى. ءتىپتى ول پىكىرلەرگە مەنى بەلگىلەپ جازىپ جاتتى. سوندىقتان تاۋەكەل ەتىپ باستاپ كەتتىك. ەكى كۇندە 9 ميلليون تەڭگەدەن استام قاراجات جينالدى. بەلگىلى مەتسانانت دۋلات تاستەكەيەۆ «قانشا جينايسىڭدار سونشا قاراجات قوسىپ بەرەمىن» دەگەن ۋادەسى بار ەدى. جالپى 19 ميلليونداي قاراجاتقا ءۇي الدىق»، - دەدى جۋرناليست ماقسات تولىقباي.
بۇگىن قۇرمەت جاڭا ۇيىندە قۇرباندىق شالىپ، قۇران وقىتتى. جاڭا جىلدان كەيىن شىمكەنتتەگى وقۋىندا تەگىن جالعاستىرادى. ەندىگى ماقساتى - التايدىڭ ار جاعىنداعى اكە-شەشەسى مەن باۋىرلارىن ەلگە كوشىرىپ الىپ كەلۋ.
«حالىققا راحمەتىمدى ايتامىن. جينالعان اقشانى قايىرىمدىلىققا جۇمساماقشى ەدىم، قاراجاتتى قولىما بەرمەي، ءۇي الىپ بەردى. يگى ىسكە ۇيىتقى بولعان ماقسات تولىقباي، دۋلات تاستەكەيەۆ اعاما جانە بارشا حالىققا راحمەتىمدى ايتامىن. الداعى ۋاقىتتا وتباسىمدى الىپ كەلىپ، مال شارۋاشىلىعىمەن جانە ساۋدامەن اينالىسسام دەگەن ويىم بار»، - دەيدى قۇرمەت.
ەسكە سالساق، شىمكەنت قالاسىنىڭ 25 جاستاعى تۇرعىنى قۇرمەت تالاپقازى ەلىمىزدىڭ باتىسىنداعى قۋاڭشىلىققا تاپ بولعان مالدى اۋىلدارعا جەم-ءشوپ جىبەرۋ ءۇشىن بۇكىل جۇمىسىن تاستاپ، قوعامدىق باستاماعا مۇرىندىق بولعان ەدى.
كەيىن ونىڭ باستاماسىنا اۋىل شارۋاشىلىعى مينيسترلىگى قۇلاق اسىپ، «قازاقستان تەمىر جولى» ۇلتتىق كومپانياسىن كومەككە تارتقان بولاتىن. سونداي-اق وعان شىمكەنتتەگى ۋنيۆەرسيتەتتە تەگىن وقۋ مۇمكىندىگى بەرىلدى. اۋىل شارۋاشىلىعى ءمينيسترى گراموتا تابىستادى.
