الماتىدا شىرشا ساۋداسى قىزىپ تۇر
سۇرانىسقا قانشالىقتى يە؟ وسى سۇراقتارعا قازاقپارات ءتىلشىسى جاۋاپ ىزدەپ كوردى.
قازىر الماتىدا شىرشا ساۋداسى قىزىپ تۇر. دۇكەندەر مەن بازارلاردان قىلقان جاپىراقتىلاردىڭ نەشە ءتۇرىن تاباسىز. باعاسى دا ءارالۋان. ساۋداگەرلەر جەلتوقساننىڭ سوڭعى كۇندەرىندە شىرشاعا سۇرانىس تىپتەن ارتاتىنىن ايتادى، سوعان وراي بيىل باعاسى دا كوتەرىلىپتى.
«بيىل شىرشا باعاسى وتكەن جىلمەن سالىستىرعاندا 20-30 پايىزعا قىمباتتادى. ادامدار نەگىزىنەن جاساندى شىرشانى تاڭدايدى. ويتكەنى ونى جىلدا قولدانۋعا بولادى. قازىر جاساندى شىرشانىڭ الۋان ءتۇرى بار. اق، جاسىل، ويىنشىق ىلىنگەن، توبەسىن قار باسقان شىرشالار دا بار. جاساندى شىرشانىڭ باعاسى 5 مىڭ تەڭگەدەن باستالادى»، - دەيدى ساتۋشى جانسەرىك تاعاباي.
ساتۋشىلار جىلدان-جىلعا تابيعي شىرشانى قولدانۋشىلاردىڭ قاتارى ازايىپ كەلە جاتقانىن ايتادى.
«قۋانارلىعى جىلدان-جىلعا تابيعي شىرشانى قولدانۋشىلاردىڭ قاتارى ازايىپ بارادى. ال جاساندى شىرشانىڭ باعاسى قولدانىلعان ماتەريالعا بايلانىستى. نەگىزى ەۋروپادان جەتكىزىلگەن شىرشا قىمبات. ال قىتاي شىرشاسى ارزان بولادى»، - دەدى ساتۋشى.
الماتىداعى سۋپەرماركەتتەر مەن دۇكەندەردە جاساندى شىرشالاردىڭ باعاسى بازارمەن سالىستىرعاندا الدەقايدا قىمبات. مىسالى، بيىكتىگى 180 س م جاساندى شىرشا 18-20 مىڭ تەڭگە كولەمىندە. ەكى مەترلىك شىرشا 30 مىڭ تەڭگە جانە ودان جوعارى. ءتالىمباقتا وسكەن، ءيىسى اڭقىپ تۇرعان سۇلۋ شىرشانىڭ باعاسى 35 مىڭ تەڭگەدەن باستالادى.
«ساتۋعا ارنالعان تابيعي شىرشانى كوبى جەكە ءتالىمباقتا وسىرەدى. كەيبىرەۋلەرى رەسەي، قىرعىزستان، قىتاي سياقتى باسقا ەلدەردەن اكەلەدى. دەگەنمەن، ساتۋشىلاردىڭ ءتىرى شىرشالاردى ساتۋعا رۇقساتى بولۋى كەرەك. بيىلعى جىلى رەيد بارىسىندا زاڭسىز اعاش كەسۋ نەمەسە ساتۋ فاكتىلەرى تىركەلگەن جوق. شىرشانى زاڭسىز كەسكەندەر قىلمىستىق جانە اكىمشىلىك جاۋاپكەرشىلىككە تارتىلادى»، - دەپ جاۋاپ بەردى الماتى قالاسى تابيعاتتى قورعاۋ پوليتسياسىنىڭ باستىعى نۇرلان قارپىقوۆ.
ايتا كەتەيىك، جاڭا جىل قارساڭىندا قۇقىق قورعاۋشىلار تەكسەرۋ شاراسىن كۇشەيتتى. مۇنداعى ماقسات مەرەكەلىك سۇرانىستى پايدالانىپ، جاسىل جەلەكتى زاڭسىز ساتۋدىڭ الدىن الۋ. اسىرەسە، ۇلتتىق پارك اۋماعىنا كىرىپ- شىعاتىن كولىكتەر ءجىتى تەكسەرىلىپ جاتىر.
