ەلىمىزدە قاي ەلدىڭ ازاماتتارى اكىمشىلىك جاۋاپكەرشىلىككە ءجيى تارتىلادى؟

بۇل تۋرالى ق ر پارلامەنتى ءماجىلىسىنىڭ دەپۋتاتى ەرلان سمايلوۆ ءمالىم ەتتى، دەپ حابارلايدى قازاقپارات ءتىلشىسى.

«ۇلتتىق قاۋىپسىزدىك كوميتەتىنىڭ «بۇركىت» ءبىرىڭعاي اقپاراتتىق جۇيەسىندەگى مالىمەتكە سايكەس قازاقستانعا سوڭعى 5 جىل ىشىندە 20 ميلليون 877 مىڭ شەتەل ازاماتى كەلگەن. ونىڭ 93 پايىزى ت م د ەلدەرىنىڭ ازاماتتارى. سونداي-اق، 5 جىل ىشىندە 400 مىڭعا جۋىق (395755) شەتەل ازاماتى اكىمشىلىك جاۋاپكەرشىلىككە تارتىلدى. ولاردىڭ 95 پايىزى ت م د ەلدەرىنىڭ ازاماتتارى»، - دەدى ە. سمايلوۆ ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ وتىرىسىندا جاساعان بايانداماسىندا.

سونداي-اق، دەپۋتات اتالعان ۋاقىت ىشىندە شەتەل ازاماتتارىنىڭ قاتىسۋىمەن ەلىمىزدە 10974 قىلمىستىق قۇقىق بۇزۋشىلىق تىركەلگەنىن العا تارتتى.

«ونىڭ ىشىندە 3,8 مىڭى مۇلىك قىلمىسى، ياعني ۇرلىق پەن قاراقشىلىق. 414 ادامعا قارسى قىلمىس. ناقتىراق ايتقاندا، 165 كىسى ءولتىرۋ جانە 249 ادام دەنساۋلىعىنا اۋىر زيان كەلتىرۋ. ودان بولەك، 172 شەتەل ازاماتى زورلاۋ فاكتىسى بويىنشا جازالاندى»، - دەيدى ول.

بۇعان دەيىن ءماجىلىس دەپۋتاتى قازاقستاندا بالالار ءتولقۇجاتىنىڭ قولدانۋ مەرزىمىن قىسقارتۋدى ۇسىنعان بولاتىن.

ودان بولەك، ەلىمىزدە ەرەسەكتەر ءتولقۇجاتىنىڭ بەتتەرى كوبەيۋى مۇمكىندىگى تۋرالى ايتىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى