ەلىمىزدە ەرەسەكتەر ءتولقۇجاتىنىڭ پاراعى كوبەيۋى مۇمكىن
«شەتەلگە ءجيى شىعاتىن ازاماتتارعا ىڭعايلى بولۋ ءۇشىن ەرەسەك ازاماتتارعا ارنالعان ءتولقۇجاتتىڭ پاراعىن 48-گە دەيىن ارتتىرۋ ۇسىنىلىپ وتىر. قازىرگى ءتولقۇجاتتا 36 بەت بار. ارينە، پاراق كوبەيگەننەن كەيىن ونىڭ باعاسى دا وسەدى. 8 اەك- تان (ايلىق ەسەپتىك كورسەتكىش) 12 اەك- كە دەيىن. سەبەبى بۇل وزگەرىس شەت مەملەكەتتەرگە جۇمىس بابىمەن ءجيى بولاتىن ازاماتتار ءۇشىن وتە ىڭعايلى. ولار قازاقستانمەن قاتار باسقا دا ەلدەردىڭ شەكاراسىنان وتەدى. دەگەنمەن بۇگىنگى 36 پاراقتى ءتولقۇجات قولدانىستا قالا بەرەدى، مەرزىمى دە سول كۇيىنشە 10 جىلعا دەيىن جارامدى بولماق»، - دەدى ەرلان سمايلوۆ ءماجىلىستىڭ زاڭناما جانە سوت- قۇقىقتىق رەفورما كوميتەتىنىڭ وتىرىسىندا جاساعان بايانداماسىندا.
سونداي- اق، دەپۋتات 36 پاراقتى ءتولقۇجاتقا ارنالعان مەملەكەتتىك باج كولەمىن وزگەرتپەۋ كەرەكتىگىن ايتتى.
«ءتولقۇجات پاراقتارىنىڭ سانىن كوبەيتۋ شەتەلگە ءجيى شىعاتىن ازاماتتاردىڭ شەكارادان ەركىن ءوتۋى مەن كوپتەگەن ەلدە بولۋىنا مۇمكىندىك بەرەدى. جانە جاڭا ۆيزا الۋ ۇشىندە وڭ اسەرى بولادى. مىسالى، ازاماتتىڭ 5 جىلدىق شەنگەن ۆيزاسى بار، ءبىراق ونىڭ ءتولقۇجاتىندا شەكارانى وتكەنى تۋرالى بەلگىنى قويۋعا ارنالعان پاراقتار سانى ءبىتىپ قالدى. بۇل جاعدايدا ول جاڭا ءتولقۇجات راسىمدەپ، ۆيزانى جاڭا ءتولقۇجاتقا اۋىستىرۋ ءۇشىن شەتەل ەلشىلىگىنە قايتا حابارلاسۋى كەرەك. بۇل ءوز كەزەگىندە ارتىق شارۋا جانە تاۋەكەلگە الىپ كەلۋى مۇمكىن»، - دەيدى ول.
بۇعان دەيىن حابارلاعانىمىزداي قازاقستاندا بالالار ءتولقۇجاتىنىڭ قولدانۋ مەرزىمىن قىسقارتۋ ۇسىنىلدى. ايتا كەتەيىك، بۇگىن ق ر پارلامەنتى ءماجىلىسىنىڭ زاڭناما جانە سوت- قۇقىقتىق رەفورما كوميتەتىندە قر كەيبىر زاڭنامالىق اكتىلەرىنە حالىقتىڭ كوشى- قونى سالاسىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىنىڭ تانىستىرىلىمى ءوتتى.
