پەتروپاۆلدا جاڭاجىلدىق بەزەندىرۋگە ءبىر تيىن بيۋدجەت قاراجاتى جۇمسالمادى

پەتروپاۆل قالاسى جاڭا جىل مەرەكەسىنە اسەم بەزەندىرىلدى. كەشە سالتاناتتى تۇردە باستى شىرشانىڭ شامى جاعىلىپ، مەرەكەلىك دۋمان ءوتتى. جالپى بيىل وبلىس ورتالىعىندا ءۇش نەگىزگى شىرشا قۇرىلدى. ولار ورتالىق الاڭدا، پەتروپاۆل اكىمدىگىنىڭ الدىندا جانە بەرەكە ىقشام اۋدانىندا ورنالاسقان.

پەتروپاۆل قالالىق اكىمدىگىنىڭ مالىمەتىنشە، جاڭا جىل مەرەكەسىنە وراي شاھاردى بەزەندىرۋگە، شىرشالاردى قۇرىپ، مۇز قالاشىقتارىن سالۋعا بيىل قازىنادان ءبىر تيىن دا جۇمسالعان جوق.

ماسەلەن ورتالىق شىرشانى ورناتىپ، اسەمدەۋمەن «اپاتتىق قىزمەت» وندىرىستىك كووپەراتيۆى اينالىستى. ونىڭ بيىكتىگى 30 مەترگە جەتەدى. ال ونىڭ ماڭىن جيناپ، اباتتاندىرۋمەن «كوممۋنحوز» ج ش س اينالىستى.

مۇز قالاشىعىن سالۋعا، ونى جارىقپەن بەزەندىرۋگە كاسىپكەرلەر دەمەۋشىلىك جاسادى. بىلتىر قالانى اسەمدەۋگە قولدانىلعان جاڭا جىلدىق ويىنشىقتاردى جونگە كەلتىرۋگە جەرگىلىكتى كوللەدجدەر كومەكتەستى. مۇز قالاشىعى پەتروپاۆلدىڭ ءتورت اۋدانىندا - ورتالىق الاڭدا، قالالىق اكىمدىك الدىنداعى الاڭدا، بەرەكە جانە 20-شى ىقشام اۋداندارىندا سالىنىپ جاتىر. پەتروپاۆلدا قۇرىلمالى شىرشا بيىل ءتورتىنشى رەت قولدانىلىپ جاتىر. وتكەن جىلى دا قالانى مەرەكەگە وراي بەزەندىرۋگە بيۋدجەتتەن قارجى بولىنگەن جوق.

اۆتور: اقەركە داۋرەنبەك قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى