ۇكىمەت باسشىسى قۇرىلىس ماتەريالدارىنىڭ قۇنىن ارزانداتۋعا قاتىستى تاپسىرما بەردى
«يندۋستريا مينيسترلىگى «سامۇرىق- قازىنا» قورىمەن، «بايتەرەك» حولدينگىمەن، «اتامەكەن» كاسىپكەرلەر پالاتاسى جانە اكىمدەرمەن بىرلەسىپ ءبىر اي ىشىندە قۇرىلىس يندۋسترياسى جوبالارىن ىسكە اسىرۋ بويىنشا 2025 -جىلعا دەيىنگى جول كارتاسىن ازىرلەسىن»، - دەپ تاپسىردى ا. مامين.
سونىمەن قاتار يندۋستريا مينيسترلىگىنە «بايتەرەك» حولدينگىمەن بىرلەسىپ، نارىقتا دەلدالداردىڭ جۇمىسىنا جول بەرمەۋ جانە قۇرىلىس ماتەريالدارىنىڭ قۇنىن ارزانداتۋ ءۇشىن 2022 -جىلعى 1-ناۋرىزعا دەيىن «ماركەتپلەيس» ونلاين الاڭىن پايدالانۋعا ەنگىزۋ جۇكتەلدى.
«يندۋستريا مينيسترلىگى باسەكەلەستىكتى قورعاۋ اگەنتتىگىمەن جانە اكىمدىكتەرمەن بىرلەسىپ، قۇرىلىس ماتەريالدارى باعاسىن نەگىزسىز ءوسىرۋ فاكتىلەرى بويىنشا ۋاقتىلى شارالار قابىلداپ، ۇنەمى باقىلاۋدى قامتاماسىز ەتسىن»، - دەدى ۇكىمەت باسشىسى.
بۇدان بۇرىن حابارلانعانداي، قۇرىلىستىڭ جالپى ىشكى ءونىم قۇرىلىمىنداعى ۇلەسى 2020 -جىلعى 12 ايدىڭ قورىتىندىسى بويىنشا 6,1 پايىزدان بيىلعى 11 ايدىڭ قورىتىندىسى بويىنشا 6,25 پايىزعا ءوستى. نارىقتى قولجەتىمدى وتاندىق قۇرىلىس ماتەريالدارىمەن قامتاماسىز ەتۋ ءۇشىن 2025 -جىلعا قاراي قۇنى 1 تريلليون تەڭگەدەن اساتىن قۇرىلىس يندۋسترياسىنىڭ 165 جاڭا جوباسى ىسكە اسىرىلادى.
