جاڭاارقادا اقسەلەۋ سەيدىمبەك اتىنداعى مۇراجاي اشىلدى

وندا قوعام قايراتكەرى، بەلگىلى ەتنوگراف، ونەرتانۋشى، جۋرناليست جانە پۋبليتسيستىڭ ەڭبەكتەرى، ءومىرباياندىق دەرەكتەرى، جەكە زاتتارى جيناقتالعان، دەپ حابارلايدى قازاقپارات ءتىلشىسى.

«وتكەن جىلى مەكتەبىمىزگە جەرلەسىمىز اقسەلەۋ سەيدىمبەكتىڭ ەسىمى بەرىلدى. كارانتين مەن قاشىقتىقتان وقىتۋدىڭ سالدارىنان ءبىز ونىڭ مۇراجايىن بىردەن اشا المادىق. ەسەسىنە مۇنى تاۋەلسىزدىكتىڭ مەرەيتويلىق جىلىندا جۇزەگە اسىرا الدىق. مۇراجايدا اقسەلەۋ سەيدىمبەكتىڭ ءومىرى تۋرالى ستەندتەر، ول تۋرالى ماقالالار، ەڭبەكتەرى، وقۋشىلاردىڭ عىلىمي جۇمىستارى مەن فوتوسۋرەتتەرى ۇسىنىلعان»، - دەدى مەكتەپتىڭ تاريح ءپانىنىڭ مۇعالىمى جادىرا رىسبەكوۆا.

مۇراجايدا جازۋشىنىڭ قالتا پىشاعى جانە ونىڭ كەيبىر جەكە زاتتارى بار. بولاشاقتا مەكتەپ وقۋشىلارى اقسەلەۋ سەيدىمبەكتىڭ ءومىرى مەن ەڭبەك جولىن مۇراجايدا جيناقتالعان قۇجاتتار مەن ول تۋرالى ماقالالارعا سۇيەنە وتىرىپ زەرتتەي الادى.

اقسەلەۋ سەيدىمبەك - جاڭاارقا اۋدانىنىڭ تۋماسى. كوپ جىلدار بويى «ورتالىق قازاقستان» گازەتىندە ەڭبەك ەتتى. 1976 -جىلدان رەسپۋبليكالىق «سوتسياليستىك قازاقستان» باسىلىمىندا ادەبيەت جانە ونەر ءبولىمىنىڭ مەڭگەرۋشىسى بولىپ جۇمىس ىستەدى. سونداي- اق، ول «زەردە» جۋرنالىندا، «الەم» الماناحىندا، مۇحتار اۋەزوۆ اتىنداعى ادەبيەت جانە ونەر ينستيتۋتىندا باسشىلىق قىزمەتتەر اتقاردى. ىبىراي التىنسارين اتىنداعى ءبىلىم بەرۋ ينستيتۋتىنىڭ ديرەكتورى، قازاق ءبىلىم اكادەمياسىنىڭ تۇڭعىش پرەزيدەنتى، پرەزيدەنتتىك مادەني ورتالىق ديرەكتورىنىڭ ورىنباسارى بولدى. ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە ءدارىس بەردى. 2003 -جىلى وعان قازاقستاننىڭ ەڭبەك سىڭىرگەن قايراتكەرى اتاعى بەرىلدى. 2004 -جىلى ول مەملەكەتتىك سىيلىقتىڭ لاۋرەاتى اتاندى.

اۆتور: اگاتا مۋحامەدجانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى